Diferentes actividaes recuperen el día a día del mes d’ochobre de 1934, nel qu’españa la revolución d’ochobre na nueche del xueves 4 al vienres 5. En concreto, el facebook de Culturamieres tien el propósitu de dis publicando los diferentes relatos que, dende tolos bandos, vinieron a contar lo que fueron aquellos díes en Mieres y nel resto d’Asturies.

Asina lo relata en primera persona’l socialista mierense Alberto Fernández: “El día cinco, a les dos de la mañana, na pequeña llocalidá de Figareo y de boca del fíu mayor de Manuel Llaneza, recibí la orden de salir a la cai, orden que tresmití al resto de comprometíos pa l’acción y que, la viérpora, pasaran la nueche en vela esperando la consigna que nun llegó. A les seis, cada quién taba nel so puestu, requisaes yá les armes en posesión, hasta entós, d’elementos derechistes de la llocalidá, más les de los guardes xuraos de les empreses mineres desarmaos ensin resistencia de la so parte. Y, como previera’l nuestru grupu –los nuestros grupos, yá que cada nueve persones componíen ún al mandu d’un responsable- fue en dirección del pueblu d’Uxo, del otru llau del ríu Caudal, considerando que los compañeros de Cuna y de Mieres s’encargaríen del cuartel de la guardia civil de Santuyano”.

Malapenes alboreciendo’l día 5, los revolucionarios tomen l’Ayuntamientu de Mieres, como dexó escrito Ignacio Lavilla nel so llibru “Los hombres de octubre”: “Los guardies, con un sarxentu al frente entregáronse y fízoselos prisioneros. Les sos armes reforzaron el meguáu arsenal revolcuionariu. Nel Ayuntamientu perdieron la vida dos guardies y resultaron feríos siete… Dos díes depués apareció escondíu otru guardia que nel momentu de la rendición buscó refuxu na torre del reló”.

Dente tolos sucesos del día en Mieres, tres de la toma del Ayunatmientu de Mieres, l’asaltu del cuartel de los guardies d’Asaltu fue’l más nomáu, como podemos comprobalo de la descripción del sucesu que dexó escrita d’aquella’l mierense Manuel Grossi Mier: “Topámonos a unos metros de la puerta del cuartel. Comprendemos qu’un retrocesu nestes condiciones diba ser da-yos a los guardies la sensación de derrota. Decidimos avanzar a toa costa. La nuestra decisión nel ataque vese coronada pol éxitu; diez minutos depués llogramos apoderanos del cuartel. Cayeropn muertos tolos guardies que s’afayaben nel interior del edificiu”.

Ante la crueldá de los sucesos, el llibru “La Revolución de Octubre”, del anarquista mierense Fernando Solano Palacio, fala de dalgún momentu xenerosu: “Ente la multitú, la muyer d’un guardia civil daba voces, preguntando pol so maríu. Lleváronla onde taba’l feríu, pa consolala. El pueblu ye xenerosu colos sos enemigos cuando estos s’alcuentren abatíos: el dolor y la miseria fai a los homes compasivos colos que sufren. Asina fue’l pueblu de Mieres y asina son tolos pueblos de la tierra”.