El Fondu Monetariu Internacional (FMI) propunxo que los executivos de la banca tengan que devolver les sos remuneraciones en casu de que se confirme qu'adoptaron "riesgos escesivos", según una meyor alliniación ente la so remuneración y los riesgos qu'adopten.

   Nel tercer capítulu de la nueva edición del Informe sobre la estabilidá financiera mundial', el FMI propón una serie d'encamientos pa evitar una asunción de riesgos escesiva per parte de los bancos mundiales, que foi una de les causes de la recién crisis mundial.

   "Ente elles, hai que mentar una meyor alliniación ente la remuneración de los executivos de la banca y el riesgu (incluyida la esposición al riesgu de los acreedores de los bancos), l'aplazamientu de parte de la compensación y cláusules de reintegru de remuneraciones", esplica.

   A esti respecto, defende qu'estos mecanismos son "especialmente útiles" cuando'l comportamientu al llargu plazu ye complicáu d'evaluar, yá que dexen axustar la compensación variable a les resultancies de los riesgos adoptaos con anterioridá.

   Coles mesmes, considera que'l conseyu d'alministración d'un bancu tendría de ser independiente de la dirección y encamienta establecer un comité d'evaluación de riesgos. Amás, recuerda que la tresparencia ye "crítica" pa la rindición de cuentes y la eficacia de la disciplina de mercáu.

   Nesta llinia, tamién cree que los supervisores tienen de cerciorase de que la vixilancia de l'asunción de riesgos nos bancos seya eficaz y ve necesario plantegase la posibilidá d'incluyir nos conseyos a los tenedores de delda, amás d'a los accionistes.

   El FMI reconoz que dalgunes d'estes midíes qu'encamienta tán aldericándose anguaño, pero incide en qu'hasta'l momentu nun fueron convalidaes empíricamente.

ESTUDIU DEL FMI.

   Según les conclusiones d'un estudiu empíricu ellaboráu pol FMI, los bancos que cunten con un conseyu d'alministración independiente de la dirección suelen asumir menos riesgos.

   Al respective de la remuneración de los executivos de los bancos, destaca qu'ésta non siempres ta rellacionada cola asunción de riesgos y apunta a que les remuneraciones venceyaes al desempeñu llaboral a más  llargu plazu tán acomuñaes a un nivel de riesgu más baxo.

   Coles mesmes, sorraya que los bancos con una gran proporción de propietarios institucionales tienden a asumir menos riesgos y que, como yera d'esperar, los periodos de tensión financiera grave alterien dalgunos d'estos efectos, porque los incentivos camuden cuando un bancu s'avera a una suspensión de pagos.

   El Fondu aprofia qu'esiste un "ampliu consensu" en que l'asunción escesiva de riesgos per parte de los bancos contribuyó a la reciente crisis financiera internacional, xunto colos fallos nel marcu regulatoriu que nun llograron prevenir esa asunción de riesgos.

   Sicasí, reconoz que se punxeron en marcha reformes destinaes a fortalecer más el marcu regulatoriu, realliniar los incentivos y promover un comportamientu prudente ente los banqueros, col fin de reforzar los marxes de capital y lliquidez que sirven de protección ya influyir nos incentivos que lleven a los banqueros a asumir riesgos escesivos.

   Nesta llinia, el FMI celebra que s'adoptaren midíes p'ameyorar la gobernanza del riesgu y llograr que los réximes de remuneración reflexen en tolos sos aspeutos los riesgos que cuerren los banqueros.

   Sicasí, alvierte de que por que sían eficaces y puedan evitar consecuencies imprevistes, estes reformes tienen de tar basaes nuna "sólida comprensión" de los factores que conducen a l'asunción de riesgos nel sector bancariu.