Unes 165.000 persones fixeron la travesía no que va d'añu, frente a les 60.000 de tou 2013

   XINEBRA.-  L'Altu Comisionado de Naciones Xuníes pa los Refuxaos (ACNUR) sollertó de que les posibilidaes de que los inmigrantes que crucien illegalmente'l mar Mediterráneu pierdan la vida na travesía dobláronse nel tercer trimestre de 2014.

   Nun comunicáu, l'axencia de Naciones Xuníes sorrayó que se rexistró una clara medría nel númberu d'inmigrantes qu'intenten cruciar el Mediterráneu y el númberu d'ellos que pierden la vida nel intentu. Frente a les 75.000 persones y 800 fallecimientos del periodu que va del 1 de xineru al 30 de xunu, nel tercer trimestre del añu (de xunetu a setiembre) cruciaron esti mar 90.000 persones y 2.200 nun sobrevivieron a la travesía.

   N'otres palabres, una persona que fai'l viaxe na primer metá del añu encara un 1,06 per cientu de posibilidaes de perder la so vida, mientres que les probabilidaes de morrer na travesía nel tercer trimestre del añu xuben hasta'l 2,4 per cientu, según l'axencia de la ONU.

   En cifres totales, 165.000 persones cruciaron illegalmente'l Mediterráneu no que va de 2014, frente a les 60.000 que lo fixeron en tol 2013, lo que fai qu'anguaño represente un récord "reflexando'l nivel de desesperación de munchos".

   "A la lluz d'estos peligros", ACNUR repitió'l so llamamientu a Europa pa que "dedique más recursos a les xeres de rescate nel mar Mediterraneu y aumente los esfuerzos pa dar alternatives llegales a estos peligrosos viaxes".

   Acordies cola Axencia de Naciones Xuníes, "la respuesta colectiva al fluxu irregular d'inmigración" tien de pasar por "caltener una fuerte capacidá pa rescatar a persones nel mar y reforzar les víes segures pa que los refuxaos atopen seguridá n'Europa". "Si Europa falla nestos esfuerzos, van siguir perdiéndose munches más vides ya incidentes como'l desastre de Lampedusa va un añu van volvese más habituales", dixo.

   "Tamos fallando  a la hora d'aprender les llecciones de los tarrecibles fechos del pasáu mes d'ochobre y cada vez más abellugaos tán afogándose intentando algamar la seguridá. Los países europeos tienen de trabayar xuníos pa reforzar y siguir cola xera vital de rescatar persones nel mar, que foi casi mayoritariamente llevada a cabu pola operación italiana Mare Nostrum pero tamién por buques comerciales", afirmó l'Altu Comisionáu de Naciones Xuníes pa los Refuxaos, António Guterres.

L'IMPACTU DE LA CRISIS DE LLIBIA

   ACNUR esplicó que l'aumentu del fluxu d'inmigrantes pol Mediterráneu débese en parte a la situación d'inseguridá en Llibia, qu'afectó especialmente a los inmigrantes y solicitantes d'asilu d'África Subsahariana y Oriente Próximu.

   Amás, señaló que la medría del númberu de muertos na travesía pel mar vien deriváu de que, dacuando, les embarcaciones tán sobresaturaes, "con casos de persones morriendo por afogase o viaxando ensin chalecos salvavides". "La traxedia de Malta'l pasáu mes, na que morrieron unes 500 persones cuando'l so barcu foi fundíu por traficantes, dexó namás once supervivientes. Los que sobrevivieron pasaron díes n'agua mirando con impotencia cómo los sos amigos y familiares perecíen", indicó.

   L'Axencia de Naciones Xuníes alvirtió de que, anque non tolos inmigrantes que crucien el Mediterraneu busquen asilu, los datos del tercer trimestre de 2014 amuesen que "la proporción de los que fuxen de la guerra o la persecución nel so países ta creciendo". En concreto, los solicitantes d'asilu de Siria y Eritrea supón casi la metá de los inmigrantes que cruciaron el Mediterraneu dende'l 1 de xunetu.

   "Munchos de los que faen el trayectu nun tien una manera llegal o segura de llegar a Europa. Tienen qu'atopase alternatives pa protexelos de los riesgos de viaxar contra redes de tráficu de persones", reclamó ACNUR. Esto inclúi aumentar les cuotes de reasentamientu y l'accesu a los visaos humanitarios pa persones que fuxen de la guerra y la persecución, según polítiques de xestión conxunta de fronteres na UE y los países de norte d'África que nun se centren na seguridá sinón que tengan tamién un claru componente centráu en Derechos Humanos y abellugaos.

   A lo último, ACNUR pidió a los gobiernos europeos que faigan más esfuerzos por facilitar el derechu a la reunificación familiar. "Tenemos qu'atopar meyores víes pa dexar qu'estes persones desesperaes atopen un llugar seguru. Pasaron peligros y esperiencies horribles que munchos de nós namás podemos imaxinar", sorrayó Guterres.