L’escritor Xurde Álvarez presenta la novela “Si’l temblor niega’l fríu”, d’Ediciones Trabe, na Sociedá La Montera de Sama, Llangréu, el 3 d’ochobre a les 19:30 h. Igualmente, esta novela va abrir nel Atenéu de Turón la nueva temporada de los Alcuentros con Autores, a finales d’ochobre, coordinaos d’equí n’alantre pol tamién escritor Ánxel Álvarez Llano, responsable del Serviciu de Normalización Llíngüística de Mieres.

N’ochobre de 1939, Adolf Hitler robla la Gnadentod, na qu’autoriza a dellos médicos a dar muerte de gracia a persones con enfermedaes incurables. Esta carta permitió-y al réxime nazi esfacese nos campos de concentración y d’esterminiu de persones non productives. “Si’l temblor niega’l fríu” narra la vida de dos muyeres nun psiquiátricu alemán de la dómina: l’ideal y el contraideal mécense y intercámbiense nesta obra densa, teatral, na que l’autor reflexa l’atmósfera irrespirable y opresiva d’una sociedá amedranada, cegarata y mezquina que convive cola crueldá y l´horror, “tantu horror qu’a cada párrafu va arrancándote dalgo per dientro hasta dexate ensin nada”.

El llangreanu Xurde Álvarez ye llicenciáu n’Alministración y Dirección d’Empreses pola Universidá d’Uviéu. Entama la so carrera como escritor en 199 cola publicación d’un poemariu de carácter social tituláu “La sema”. Dixebráu en tres partes, “Ería”, “Semiente” y “Collecha”, el llibru ye un reapsu a una “tierra resquebrada, sangrante; patria ensin ecu; ensin ecu de la so propia voz, erma de fe, erma de suaños, cayida a la ver’l camín” que’l poeta contempla dende’l dolor común de lo propio.

Nel 2004 publica “No fondero de l’alcordanza de Dios”, novela social na que retrata la dura y descarnada supervivencia d’una familia a lo llargo de los nueve meses que diba durar el plante más llargu d’Europa hasta entós y que trescurriría dende payares de 1932 hasta agostu de l’añu siguiente.

Esi mesmu añu consigue con “Les llames del to llar antiguu” el premiu de textos teatrales de l’Academia de la Llingua Asturiana.

En 2008 vería la lluz “Tierra d’esperanza”, poemariu que continúa la filosofía de “La sema” y na que se retoma’l final del llibru anterior pa sobresalir la voz del “nosotros” en vez de la del “yo”, como se ficiera nueve años enantes.

Yá nel 2009 publica “La caída”, primer poemariu non social del autor y nel que cuenta, en forma de diariu, la visión del mundu d’una persona dende’l día nel que se produz un derrumbe emocional hasta que llogra ver la primer rayadina d’una lluz en forma d’esperanza.

Con “Si’l temblor niega’l fríu”, regresa diez años depués al campu de la novela y vuelve facelo con un textu atrevíu y complexu, nel que trata con fondura a los personaxes y nos que nos avera, al traviés del llinguaxe, a un mundu inhóspitu.