Según informaron a Europa Press delles fontes del Govern, esti llunes l'Executivu autonómicu colgó na intranet 'Atri', a la que tienen accesu los emplegaos públicos, un anunciu onde informaba que la Conselleria de Gobernación y Relaciones Institucionales abría un procesu de selección específicu pal 9 de payares.

   Delles persones inscribiéronse na selección, anque la cifra total de los que lo fixeron nun tescendió, y el procesu paralizóse esti martes tres la decisión del TC, según aprofió'l departamentu.

   Gobernación destacó qu'en toles elecciones qu'entama la Generalitat, el Govern emite una solicitú onde los emplegaos públicos pueden apuntase pa trabayar na xornada de los comicios.

   Tamién pueden apuntase persones que nun trabayen pa la Generalitat pero que lo faen n'otra alministración pública, o bien que cunten col aval d'un emplegáu públicu del Govern.

   Por trabayar nesta xornada dominical, el Gobiernu catalán ufiertaba una compensación de 150 euros por responsabilizase de dos meses, y 120 por una, namá naquellos puntos de votación onde'l númberu de meses sía impar.

   El trabayu consiste en tar el día de la consulta de les 7.30 hores hasta que remate'l recuentu y l'unviar los datos, y les funciones pasen por asegurar la disponibilidá de material, sofitar a los miembros de la mesa a lo llargo de la xornada, arrexuntar datos, dar cuenta d'incidencies y otros trámites alministrativos.

   Los requisitos pa participar son tener ente 18 y 65 años, disponer del títulu de graduáu escolar o equivalente, trabayar en cualquier alministración pública o ser propuestu por daquién que trabaye y disponer d'un teléfonu móvil operativu na xornada de la consulta hasta les 24.00 hores.