El proyectu de Presupuestos Xenerales del Estáu (PXE) presentáu pol Gobiernu esti martes contempla una partida de 144 millones pa la parte asturiana de la variante de Payares, infraestructura que va sirvir pa llevar l'alta velocidá ferroviaria a Asturies.

   Polo que respecta al Grupu Fomentu, qu'atropa 247,4 millones n'Asturies, los PXE tamién contemplen doce millones d'inversión pa l'autovía Uviéu. La Espina-Caneiru y otros dole pal tramu de l'Autovía del Cantábricu Unquera-Pendueles. Tamién figuren siete millones pa los accesos a El Musel, en Xixón, y 23 millones pa caltenimientu y esplotación de carreteres.

   A los puertos de Xixón y Avilés, los PXE dediquen una inversión en 2015 que xube a 18,2 millones d'euros. Según datos apurríos pol PP nuna rueda de prensa n'Uviéu, el documentu tamién recueye una partida importante no que se refier al Ministeriu d'Agricultura, Alimentación y Mediu Ambiente, que xube a 53,2 millones y que se van repartir nos 23,3 pal saneamientu de Xixón, los 11,7 pal saneamientu y depuración d'agües residuales y 2,8 pa la dirección xeneral de Sonstenibilidá de la Mariña y el Mar.

   La Confederación Hidrográfica del Cantábricu contempla inversiones por valor de 13,6 millones, que van afectar a actuaciones en Cangues d'Onís, Morcín, Uviéu, Panes y Cabrales.

   A lo último, Agües de les Cuenques del Norte va tener 29,7 millones de los que 8,3 van dedicar a la depuradora de San Cloyo (Uviéu), 15,6 millones a la depuradora de Villaperi (Uviéu) y 5,6 millones pa la estación de tratamientu d'agua potable de L'Ablaneda (Corvera).