Mañana vienres 26 de setiembre, a partir de les 19:30 hores, y nel patiu del Centru de Cultura Antiguu Institutu de Xixón, l'Asociación Cultural L’Arribada entama la edición novena de La Vagamar con un homenaxe al xesuita y escritor Federico González-Fierro Botas, que quier ser tamién una reconocencia al Coleutivu Manuel Fernández de Castro y al so trabayu pola normalización llingüísticu ente la comunidá cristiana asturiana.

L'actu empezará con un falamientu del corrodinador de L'Arribada, l'escritor Humberto Gonzali, y cola primera parte de l'actuación de la Coral Asturiana de Gijón. Continuará con varies intervenciones sobre la vida y obra de Fierro Botas, a cargu de Carlos Rubiera (conceyal de Cultura y Educación), Xosé Nel Riesgo (director de la FMCEyUP), Xosé Ramón Iglesias Cueva (representante de l'Academia de la Llingua), Ramón d'Andrés (Filólogu y miembru del equipu de traductores y espertos de la Biblia n'asturianu), Pablo González-Fierro Huerta (sobrín de Federico González-Fierro Botas) y Xuan Pandiella (presidente de l'Asociación de Vecinos San Emiliano de Vega).

Depués una llectura poética n'asturianu y rusu, con acompañamientu musical de Dani García de la Cuesta y onde participarán Aurora García Rivas, Ramón d'Andrés, Xosé Bolado, Xuan Xosé Sánchez Vicente, Humberto Gonzali y Marina Mikayelyan, fadrá recordanza de dos llibros qu'espeyen la faceta de traductor de Fierro Botas,  l'Antoloxía Poética Asturiana y Poesíes Llíriques d'Aleksandr Pushkin. L'actu terminará cola segunda parte de l'actuación de la Coral Asturiana de Gijón.

Federico González-Fierro Botas nació n’Uviéu (30 de payares de 1942), cursó los sos estudios nel Institutu de Bachilleratu Alfonso II, diplomóse en Llingües Clásiques (Llatín y Griegu) y doctoróse en Teoloxía y en Ciencies Polítiques y Socioloxía cola tesis doctoral titulada “La formación sindical impartida por Centrales representativas en España, 1976-1992”. Llicencióse tamién n’Hestoria siendo profesor d’Historia social. Foi espertu en llingua y lliteratura ruses y profesor visitante en delles universidaes de l’antigua Xunión Soviética y de l’actual Federación Rusa.

Cura obreru nos años 60 y 70 del sieglu XX, trabayó d’empleáu manual de fábriques, carteru y otros en Cataluña, Galicia y per Europa. Nesi tiempu collabora con delles organizaciones obreres, sobremanera en materia de formación de los sos militantes. En 1996, fai un manual de formación sindical. Viaxa en numberoses ocasiones a la Xunión Soviética onde surde’l so interés pola cultura rusa. Destináu pola so orde a Xixón trabaya como profesor na Fundación Revillaxixéu, onde sedría xefe d’estudios ya inxerta  nel curriculu del centru educativu Llingua y Cultura Asturiana.

Foi miembru fundador del Coleutivu Manuel Fernández de Castro, entidá qu’axunta sacerdotes favorables a la normalización de la llingua asturiana y que presidiría ente 1988-2002. Dende esta asociación publica col tamién sacerdote Alexandru Rodríguez Alonso la torna al asturianu de la Lliturxa Católica y otres obres del mesmu calter. Ye cotraductor del Evanxeliu de San Lluques al asturianu. En1991 tradució tamién al asturianu les Poesíes Llíriques del rusu Alekxandr Pushkin. Asinamesmo, collaboró dende’l primer momentu cola Sociedá Bíblica Internacional nel proyectu de torna al nuesu idioma de los distintos llibros de les Sagraes Escritures. Col estudiu Reflexión ético-política ante o referéndum do Estatuto de Autonomía para Galicia, espublizáu na revista “Encrucillada” nel 1980, recibe’l XXIII Premiu periodísticu “Fernández Latorre” de La Voz de Galicia.

Foi Asesor de Xusticia y Paz d’Asturies dende 1985 y tamién Cordinador de la Vicaría Xeneral del Arzobispáu d’Uviéu pa les traducciones bíblico-llitúrxiques al asturianu 1988-2002 y patronu de la Fundación Caveda y Nava.  El 26 xunu de 2002  morría a los 59 años nun acidente de tráficu en Vladivostok (Rusia).

El Conceyu de Xixón convoca añalmente, dende 2008, el Premiu Federico G.- Fierro Botas d’ensayu y trabayos d’investigación. Igualmente, L’Academia de la Llingua Asturiana convoca’l Concursu de recoyida de material lliterario escrito Federico G.- Fierro Botas.