La productora de 'Vivir es fácil con los ojos cerrados' pide'l sofitu del Gobiernu: "Que nun nos dexe de llau como hasta agora"
Madrid (E.P.).-Enantes de llegar a l'Academia de Cine, onde esti miércoles se dio anuncia de que la película escoyida pa optar a representar a España na próxima edición de los Premios Óscar, l'actor Javier Cámara, protagonista de la película finalista ('Vivir es fácil con los ojos cerrados'), mercó un ramu de flores pal ganador, convencíu de que cualesquier de les otres dos candidates diba ser la escoyida. "El cine español ta vivu por muncho qu'haya dificultaes", señaló l'actor emocionáu en conociéndose la noticia de que la so película ye la escoyida.
L'actor y la productora del filme, Cristina Huete, manifestaron l'allegría que supón ser escoyíos, pero tamién fueron bien duros col Gobiernu, al que pidieron compromisu y sofitu, y al que reclamaron que pague les "deldes" que tien coles películes estrenaes en 2012, en referencia a les ayudes a l'amortización qu'entá tán pendientes.
"Necesitamos el sofitu del Gobiernu, que nun nos dexe de llau como hasta agora --indicó Huete, que califica de "bien grave" la situación actual-- "Queremos que paguen les amortizaciones de 2012, tamos bien afogaos. Vamos tener que dir nalando a Los Ángeles, gustaríame dir nun avión como tol mundu. Les productores pequeñes tán en situación límite".
Según indicó a los medios tres l'anuncia de la película escoyida, una de les películes que s'atopen nesa situación ye 'La artista y la modelo', dirixida por Fernando Trueba y producida por ella. "Quiero siguir faciendo películes pero nun lo tenemos bien si'l gobiernu nun paga les sos deldes col cine español", dixo.
Por ello, espera que se cumplan los "plazos fixaos por llei" y que se cumpla'l "compromisu que l'Estáu tien col cine español". "Vivimos bien al día, lo ganao con una película inviértese na siguiente. Nun somos una gran multinacional nin una productora. Tenemos que facer munchos númberos y cuentes", insiste.
"DURA" CARRERA ESCONTRA LOS ÓSCAR
Tal y como destacó Javier Cámara, l'equipu de 'Vivir es fácil con los ojos cerrados' tien agora un difícil camín per delantre. "Entama un viaxe más idealista que'l qu'entamó Carrión: enfrentase a alredor de 50 películes d'otros países", dixo l'actor, que piensa que la eleición tuvo "bien reñida".
L'intérprete destaca'l gran añu que ta consiguiendo'l cine español, una "taquilla preciosa" gracies a películes como 'Ocho apellidos vascos', '10.000 km' o 'El niño', y otres que queden por estrenar como 'Torrente', 'La isla mínima' o 'Mortadelo'. Según afirma sosprendíu, ye un "bon añu" a pesar de que'l cine español ta tan "nefastamente sofitáu". "A pesar de too siguen cuntándose hestories", dixo.
Tocante a les posibilidaes d'esta película, Huete confía nun bon resultáu. Entá queden dos pasos hasta conocese cuáles van ser finalmente les películes nominaes y, hasta entós, l'equipu de la película hai que viaxar al otru llau del Atlánticu pa entamar a amosar el so trabayu a los académicos americanos. La productora del filme cree que la respuesta va ser positiva, porque la cinta recueye dellos elementos que van ser bien recibíos: la educación y la llibertá. Pel momentu, ta previstu l'estrenu en Seattle, Los Ánxeles y Nueva York.
Huete tamién llamentó que la so película, que cunta cola collaboración de TVE, nun tien el sofitu que se tien coles televisiones privaes. "La promoción de Telecinco ye espectacular, o d'Antena 3. Oxalá la televisión pública aprienda d'esto", dixo, de la que llamentó la dimisión esti miércoles del direutor de RTVE, Leopoldo González-Echenique.
