El presidente de RTVE, Leopoldo González-Echenique, presentó esti xueves énte'l conseyu d'alministración la so dimisión como presidente de la corporación, según informaron a Europa Press fontes del conseyu.

    Echenique aplazare al xueves la celebración d'esti conseyu, previstu pal llunes, yá que buscaba "un marxe" p'axustar col Ministeriu de Facienda una inyeición económica de 130 millones d'euros comprometida dende'l pasáu branu.

    Según estes mesmes fontes, la imposibilidá de llograr la totalidá d'esta cantidá podría llevar a dimitir al presidente de la corporación, quien tamién tenía previsto abordar nesti conseyu'l presupuestu de RTVE incluyíu nel anteproyeutu de Presupuestos Xenerales del Estáu.

    Echenique foi escoyíu presidente de la corporación pol Congresu de los Diputaos el 28 de xunu del añu 2012. La eleición foi por mayoría absoluta, en segunda vuelta y convirtióse d'esta manera nel tercer presidente de RTVE designáu pol Parlamentu.

    Echenique sustituyó a Alberto Oliart nel cargu y llegó acopañáu pol nomamientu d'otros cuatro nuevos conseyeros escoyíos pol Congresu y el Senáu: José Manuel Peñalosa, Fernando Navarrete y Marisa  Ciriza, propuestos pol PP, asina como Oscar Pierre, propuestu por CiU.

     Llicenciáu en Drechu y en Ciencies Económiques y Empresariales pola Universidá Pontificia de Comillas ICADE y miembru del Cuerpu d'Abogaos del Estáu dende 1996, Echenique tamién foi subdireutor de los Servicios Xurídicos de la Comisión Nacional del Mercáu de Valores (1998-1999) y dende xunu de 2000 a ochobre de 2002, direutor del Gabinete Téunicu del Subsecretariu d'Economía.

    Amás, foi secretariu xeneral de Barclays Bank, ente 2003 y xunetu de 2008, cuando s'incorporó al Grupu NH, onde foi secretariu xeneral hasta xunu de 2012 y conseyeru de distintes entidaes como REDE.es, Centru pal Desenvolvimientu Téunicu Industrial (CDTI), AUDENASA, Bancu Zaragozanu y ENCE.