El presidente del Bancu Central Européu (BCE), Mario Draghi, repitió esti miércoles que va caltener los estímulos na política monetaria nun "periodu llargu de tiempu", pero incidió en que pa solucionar los problemes de la eurozona tamién ye necesariu que los países apliquen reformes fiscales y estructurales "afayadices".

   Nuna entrevista a 'Europa 1', Draghi aportunó en que la política monetaria nun puede ser lo único que xenere crecedera, sinón que tien de dir acompañada de reformes estructurales. "El creitu ye necesariu, pero non una condición abonda pa tener crecedera", alvirtió.

   Na so opinión, munchos países del euru entamaron y diseñaron reformes nun llargu tiempu, pero remarcó que lo que se precisa agora ye "acción". "Tienen qu'implementar estes reformes y cada país tien la so propia axenda específica", sorrayó.

   Nesti sen, volvió asegurar que la política monetaria va siguir siendo acomodaticia un "llargu tiempu", asina como'l Conseyu de Gobiernu del BCE tien un compromisu "unánime" pa utilizar los preseos disponibles dientro del so mandatu pa devolver la inflación cerca, pero debaxo, del oxetivu del 2%.

   Coles mesmes, Draghi refugó qu'esista un riesgu de deflación na eurozona, sinón más bien la posibilidá de qu'haya una inflación "demasiáu baxa" un llargu periodu nel conxuntu de la eurozona nun contestu de recuperación "modesta, débil, desigual y fráxil, pero non de recesión".

   El presidente del BCE aprofió que'l principal "enemigu" pa Europa ye'l "desempléu", tanto'l xeneral como'l xuvenil. Sicasí, amestó que ta causáu por una amplia falta d'enfotu nel futuru y ente estaos miembros. "Tenemos que lluchar contra ello", alvirtió.

   Al respective de Francia, Draghi reconoció qu'odia la espresión "enfermu d'Europa", qu'anguaño s'aplica al país galu, y aseguró qu'Europa precisa una Francia "competitiva" y "fuerte" na que la competitividá conviva cola solidaridá.