La Plataforma Víctimes Alvia 04155 amosó la so "indignación" y "refugu" al nomamientu como ministru de Xusticia del hasta agora secretariu d'Estáu d'Infraestructures, Rafael Catalá, tres "les sos mentires y les sos posibles responsabilidaes polítiques" nel accidente ferroviariu de Angrois "que causó 80 muertos y más de 140 mancaos".

   Esta plataforma de víctimes denuncia que Catalá "nun fixo nada por depurar responsabilidaes, nin asumió pa sí nenguna" dempués del accidente de tren asocedíu'l 24 de xunetu de 2013 en Santiago, sinón que "namás mintió y negó que fuera un accidente de l'alta velocidá española pa defender intereses económicos".

   "Asina lo espresó nuna llamentable entrevista falta d'humanidá, namás cuatro díes dempués de la catástrofe, cuando entá delles víctimes taben ente la vida y la muerte y munchos soterraben a los sos familiares", refarten nun comunicáu esti miércoles.

   Amás, reprochen qu'en xunu de 2012, "siendo tamién secretariu d'Estáu de Infraestructura Rafael Catalá", autorizó nos trenes Alvia la desconexón del sistema de control de velocidá ERTMS "ensin nengún análisis previu". Al respeuto, recuerden que "de tar activáu'l sistema ERTMS, evitárase l'accidente, como señalen los peritos forenses".

   Por ello, acusen directamente de que se tomaron decisiones qu'amenorgaron claramente la seguridá de los pasaxeros, siendo unu de los responsables políticos Rafael Catalá".

   "Nun puede ser ministru de Xusticia quien hasta va unos meses tenía de forma direuta o indireuta so la so dirección a los responsables d'ADIF, dellos imputaos na causa abierta pol accidente. D'él tamién dependía Renfe y la mesma Secretaría d'Estáu que s'encarga ente otros aspeutos d'establecer la normativa qu'ha de rexir nel sector ferroviariu y sobre manera, na alta velocidá y la seguridá na circulación", prosiguen nos sos reproches.

INTERFERIR EN PROCESU XUDICIAL

   Nesta llinia, les víctimes del accidente ferroviariu en Santiago de Compostela tarrecen qu'esta elección pal Ministeriu de Xusticia "pueda interferir nel procesu xudicial" abiertu por esti accidente. Por ello, daquién que "ta políticamente arreyáu", censuren, "nun puede ser el máximu responsable del Gobiernu en materia de Xusticia".

   Asina, la Plataforma Víctimes Alvia 04155 refuga de plenu un nomamientu que considera "una burlla y una falta de respetu a la memoria de los finaos, a les sos families, a toles víctimes del accidente y a tolos españoles".