Madrid (E.P.) .-Igualdá Animal anunció que la campaña que convocó'l pasáu 4 de setiembre contra la venta de pieles d'animales nel sector de la moda yá recibió les firmes de "más de 100.000 persones".

   La iniciativa, que superó les 50.000 firmes nes sos primeres 72 hores d'esistencia, foi sofitada pola actriz Alicia Silverstone el pasáu 11 de setiembre, coincidiendo cola Selmana de la Moda de Nueva York. La intérprete compartió entós al traviés de la so cuenta de Twitter un videu de la organización acompañáu de les palabres "Conoz les 7 marques venceyaes cola crueldá estrema".

   "Más de 100.000 persones roblaron yá'l nuesu pidimientu pidiendo a estes grandes firmes que dexen de vender piel, qu'apuesten por una moda ensin crueldá animal. Ye un mensaxe bien claro. Resulta paradóxico qu'un mundu que fai rumbu de tar a la vanguardia nesta temi siga tan fondiáu nel pasáu", aprofió'l coordinador internacional d'Igualdá Animal, Javier Moreno.

"UN MALTRATU BIEN ESTENDÍU"

   Según esplica la organización, arriendes d'una investigación que realizó de forma tapada, pudo documentar un maltratu "bien estendíu" en granxes de coneyos que depués suministren la piel a grandes empreses del sector testil como Burberry, Dior, Armani, Louis Vuitton, Yves Saint Laurent o Marc Jacobs, ente otros.

   Nesti sen, señala que los coneyos, animales "altamente sensibles", son forzaos nes granxes a vivir en pequeñes xaules de barrotes "de metal duro" de les que son retiraos a los dos años, cuando son "estampaos contra'l suelu" y "cutíos hasta la muerte" delantre de los sos compañeros y darréu espelleyaos pa llograr la so piel. Nel casu d'exemplares enfermos, mancaos o lisiaos, los propietarios de les granxes nun-yos apurren nengún tratamientu médicu".

   Pela so parte, la Organización Interprofesional Cunícola (INTERCUN), qu'engloba al 80 per cientu del sector de la cría de coneyos p'aprovechar la so carne y piel n'España, refugó nun comunicáu del 8 de setiembre estes acusaciones.

   Al so xuiciu, la denuncia d'Igualdá Animal non reflexa práctiques "habituales o amparaes" nin representen "en nengún casu" al sector, que "trabaya viviegamente" pola meyora del bienestar de los animales.

   Según aseguraron entós, nes instalaciones los animales son criaos atendiendo a les "más estrictes esixencies sanitaries, de bientar animal y medioambientales" qu'establez el Modelu Européu de Producción (MEP).

FOTO: @IgualdadAnimal