Madrid (EP). Los desastres naturales movieron a 21,9 millones de persones de 119 países en 2013, una cifra que casi triplica les 8,2 millones que fueron espulsaes de les sos cases esi añu de resultes de conflictos armaos, según un informe del Conseyu Noruegu pa los Refuxaos (NRC).

El trabayu revisó les cifres procedentes de bases de datos sobre abelugaos de la Organización Internacional pa les Migraciones (OIM), la Federación Internacional de la 'Cruz Roja' y diverses axencies de Naciones Xuníes y concluyó que'l riesgu de desplazamientu por cuenta de desastres naturales "doblóse" dende 1970.

La NRC atribúi esti enclín al aumentu de la población que vive nes ciudaes, que según Naciones Xuníes, medró un 187 por cientu (de 1.350 millones a 3.880 mil millones) dende 1970 a 2014 en tol mundu y un 326 por cientu (de 680 millones a 2.900 millones) nel casu particular de los países en desarrollu.

Amás, la meyora nes midíes de prevención y respuesta a desastres naturales nesti periodu dexó qu'un númberu mayor de persones sobrevivan a estos eventos pero, coles mesmes, terminen engrosando los númberos de movíos.

ASIA, EL CONTINENTE MÁS AFEUTÁU

Según el documentu, la medría rexistrada nes últimes cuatro décades foi especialmente intensa n'Asia, la rexón "más afeutada" polos eventos meteorolóxicos estremos, atropando'l 80,9 por cientu de los movíos a nivel mundial ente 2008 y 2013 por esta razón y los 14 desastres "más devastadores" de los más de 600 rexistraos nesi últimu añu tocantes a númberu de refuxaos.

Nesti sen, la población más cutida polos desastres naturales en 2013 foi la filipina, un país qu'ocupa los dos primeros puestos del ranking colos tifones Haiyan (mes de payares) y Trami (mes d'agostu), que provocaron el desplazamientu de 4.095.000 y 1.744.000 persones, respeutivamente.

Síguen-y países como China, onde les inundaciones espulsaron a 1.577.000 ciudadanos de les sos cases y el tifón Fitow fízolo con 826.000. De siguío, atópase Bangladesh, onde'l ciclón Mahasen provocó 1.100.000 refuxaos, o India, onde tanto les inundaciones como'l ciclón Phailin movieron caún a más de 1.000.000 persones.

En cuantes al continente africanu, ésti concentró cinco de los diez mayores desplazamientos de 2013 en relación cola población de cada país. En tolos casos, trátase d'inundaciones na temporada d'agües en países semiáridos de la rexón del Sahel como Niger, Chad, Suden y Sudán del Sur, según Mozambique, per otru llau.

Nel casu concreto de Sudán del Sur, l'informe apunta que los desastres naturales como seques ya inundaciones y la violencia dende la independencia del Estáu en 2011 combináronse pa crear una de les "peores seguridaes alimentaries del mundu".

Asina, cita l'exemplu de 475.000 refuxaos del país que, fuxendo del conflictu armáu, llegaron en mayu de 2014 a Bor, col establecimientu de 95.000 d'ellos n'asentamientos temporales asitiaos cerca del Nilo, "desconociendo" el riesgu d'inundaciones que habría dempués, na temporada d'agües.