El ministru d'Industria, Enerxía y Turismu, José Manuel Soria, avanzó qu'agostu va ser el meyor mes de tola hestoria del turismu n'España en cuanto al númberu absolutu de viaxeros internacionales recibíos.

Nuna entrevista concedida a RNE, el responsable d'esti Departamentu, a pesar de nun disponer de cifres oficiales, aseguró que los datos rexistraos el pasáu mes en términos de llegaes de visitantes a España, son "cimeres" respecto a les de "cualquier mes".

Asina, repitió que 2014 va ser nuevamente un añu de "récord históricu" pal turismu, con una crecedera acumulada superior al 7% hasta xunetu nel númberu de llegaes de turistes internacionales al respective de 2013, y percima del 4% nel casu del gastu turísticu.

Yá nel mes de xunetu, España llogró'l segundu meyor datu de la hestoria, per detrás d'agostu de 2013, con un aumentu na llegada de turistes internacionales del 5,9%, hasta 8,3 millones, tal como avanzó'l mesmu Soria.

Ello ye que los 36,3 millones de turistes estranxeros que visitaron España ente xineru y agostu supunxeron el meyor rexistru hestóricu de visitantes, según los datos de la Encuesta de Movimientos Turísticos en Frontera (Frontur), que va dar a conocer los datos d'agostu la próxima selmana.