L'Índiz de Precios de Consumu (IPC) del Principáu d'Asturies xubió un 0,2 por cientu n'agostu respeuto al mes anterior y la so tasa interañal asitióse en -0,7 por cientu, según informó esti vienres l'Institutu Nacional d'Estadística (INE).

A nivel nacional, la tasa de variación añal del IPC nel mes d'agostu ye del -0,5 por cientu, dos décimes per baxo de la rexistrada'l mes anterior. La tasa añal de la inflación subxacente caltiense nel 0,0 por cientu.

Per comunidaes autónomes, la tasa añal del IPC mengua en toles comunidaes, sacante la Comunidá de Madrid (caltiense nel -0,3%) y la Comunidá Foral de Navarra (xube dos décimes hasta'l -0,8%). Los mayores descensos hébolos en Canaries (-0,7%) y La Rioxa (-0,7%), con amenorgamientos de tres décimes.

Tocante a Asturies, el grupu que rexistró una mayor xubida añal d'índiz de precios en tasa interañal ye'l d'Enseñanza (1,7%); siguíu de Vivienda (1,3%); Bébora alcohólico y tabacu (0,3%); Otros (0,3%); y Hoteles, cafés y restoranes (0,1%).

Sicasí, nel últimu añu baxaron los precios en Comunicaciones (-6,0); Ociu y cultura (-2,7%); Alimentos y bébora non alcohólico (-2,2%); Melecina (-1,4%); Menaxe (-0,6%); Tresporte (-0,5%); y Vistíu y calzáu (-0,2%).

Tocante a la tasa mensual nel Principáu, la mayor xubida rexístrase nel apartáu d'Ociu y Cultura (1,1%), la mesma medría qu'Hoteles, cafés y restoranes (1,1%). Tamién medraron los precios de Vivienda (0,5%); Menaxe (0,4%); Melecina (0,3%); Bébora alcohólico y tabacu (0,2%); y Alimentos y bébora non alcohólico (0,1%).

Al respeutive de xunetu namái baxaron los precios de Vistíu y calzáu (-0,9%) y de Tresporte (-0,4%), mientres que siguieron igual los precios de Comunicaciones, Enseñanza y Otros.

Pa finar, no que va d'añu resulta destacable'l descensu nos precios de Vistíu y calzáu, con un -17,3%, asina como la cayida en Comunicaciones, de -4,1%.