Los Gobiernos europeos yá alcordaron a finales de xunetu prohibir "la compra, vienta, intermediación o prestación d'asistencia na emisión o cualesquier otra forma de negociación, de manera directa o indirecta, en relación con bonos, obligaciones, acciones o preseos financieros similares con vencimientu a más de 90 díes emitíos dempués del 1 d'agostu de 2014 por cinco bancos propiedá del Estáu rusu: el Sberbank, el VTB Bank, el Gazprombank, el Vnesheconombank (VEB) y el Rosselkhozbank.

   La UE va prohibir agora comerciar con nuevos bonos, acciones o preseos financieros similares con un llargor que pase los 30 díes nun intentu por acutar inda más l'accesu al financiamientu nos mercaos de capitales europeos.

   Tampoco se van poder comerciar bonos o acciones con un llargor cimeru a los 30 díes de los seis compañíes d'enerxía y defensa sancionaes. Rosneft, Transneft y Gazprom Neft son les empreses enerxétiques sancionaes, según fontes europees.

   Igualmente van prohibise "los servicios rellacionaos cola emisión" de dichos preseos financieros, como'l brokering, según informó la UE nun comunicáu.

PROHÍBENSE SERVICIOS PA PRODUCIR PETRÓLEU

   El nuevu paquete de sanciones prevé tamién la prohibición de dar servicios necesarios pa la esploración y producción petrolera n'agües fondes, la esploración o producción petrolera nel Árticu y proyectos de petroleu d'esquistu en Rusia, por exemplu servicios de perforación, pruebes en pozos o servicios de disboscamentu.

   Los Ventiocho yá alcordaron a finales de xunetu que la esportación de "determinaos equipos y tecnoloxía rellacionada cola enerxía", llindáu al sector petroleru, quedaría "condicionada a una autorización previa" y que se refugaríen les llicencies d'esportación "pa la esploración y producción de petroleu n'agües fondes, petroleu d'esquistu y esploración de petroleu nel Árticu" pero dexaron el sector del gas fuera de les sanciones, dada la so mayor sensibilidá.

   La prohibición d'esportar bienes y tecnoloxíes d'usu dual, ye dicir d'aplicación civil y militar, pa "usu militar" en Rusia va ampliase agora a "una llista de nueve compañíes de defensa mestes, que nun van poder recibir bienes d'usu dual de la UE", según la nota.

   El nuevu paquete nun prevé ampliar l'embargu d'armes a Rusia alcordáu en xunetu pa los nuevos contratos  coles mires d'incluyir a los yá roblaos como los portahelicópteros Mistral de Francia a Rusia, según fontes europees.

   Sicasí, sí contempla reforzar l'embargu d'importación y esportación d'armes a Rusia "pa correxir delles inconsistencies identificaes na aplicación del embargu rellacionaes cola asistencia financiera y técnica pa les importaciones y esportaciones d'armes", precisaron otres fontes.

VA SANCIONAR A OTROS 24 DIRIXENTES

   El nuevu paquete de sanciones igualmente prevé ampliar la llista de dirixentes sancionaos a otres 24 persones, ente políticos y oligarques rusos, los nuevos líderes de Donbás y del Gobiernu criméu y que les sos identidaes conoceránse esti vienres cuando se publiquen les sanciones nel Diariu Oficial de la UE.

   La UE sancionó hasta la fecha a un total de 95 dirixentes rusos y ucranianos, ente ellos a unu de los viceprimeros ministros rusos, Dimitri Rogozin, y dellos asesores del presidente, Vladimir Putin, amás d'otres 23 empreses y asociaciones por socavar la integridá territorial d'Ucrania o beneficiase o sofitar el conflictu.

   Los Ventiocho alcordaron amás ampliar la base llegal pa conxelar los activos y prohibir la entrada al territoriu européu de "persones o entidaes que realicen transacciones colos grupos separatistes na rexón de Donbas".