L'Asociación d'Internautes (AI) y l'Asociación d'Usuarios d'Internet (AUI) presentaron nel Senáu un escritu pol que piden a los grupos políticos incluyir dos enmiendes nel Proyectu de Llei de Propiedá Intelectual que se va tramitar nel Senáu, pol qu'encamienten a esaniciar tanto la conocida como 'tasa Google' como'l canon dixital.
Na primer enmienda, dambes asociaciones piden la supresión del artículu 32.2 de la llexislación qu'inclúi'l pagu d'una compensación "irrenunciable" por parte de los agregadores dixitales a los xeneradores de noticies, conocida como 'tasa Google'.
Amás, na segunda enmienda, piden retirar el canon pol derechu de copia privada o bien que s'aplique directamente sobre la obra que se xenera. Los internautes recuerden que l'actual reforma limita la copia privada al ámbitu personal y que "l'enclín internacional" ye la eliminación de los cánones.
El pasáu llunes, delles asociaciones d'internautes y editores españoles, según representantes del sector dixital, alcordaron unviar una serie d'enmiendes a los grupos políticos, ente les que s'incluyía'l pidimientu de vetu pa tola llei.
Al actu nel Senáu fueron Víctor Domingo, presidente de l'Asociación d'Internautes (AI); Miguel Pérez Subías, presidente de l'Asociación d'Usuarios d'Internet (AUI); Ignasi Labastida de Creative Commons; Emilio Ontiveros, presidente d'Analistes Financieros Internacionales (AFI) y Arsenio Escolar, presidente de l'Asociación Española de Publicaciones Periódiques (AEPP).
Foto: GOOGLE
