El próximu presidente de la Comisión Europea, el conservador luxemburgués Jean-Claude Juncker, va anunciar güei a mediudía l'organigrama del so equipu y el repartu de carteres ente los comisarios de cada Estáu miembru. L'únicu puestu seguru ye'l de la candidata italiana, Federica Mogherini, que va ser vicepresidenta Alta Representante pa la Política Esterior.

   El candidatu español a comisariu, Miguel Arias Cañete pidió a Juncker cuando s'axuntó con él la selmana pasada una "cartera importante" alegando qu'España "cumplió los sos deberes comuñales" y "ta ente los Estaos grandes de la UE". Cañete díxo-y amás que l'únicu puestu que nun quier ye'l de comisariu d'Agricultura porque se dedicó tola so vida a esta materia.

   Nos diversos organigrames de la nueva Comisión que se filtraron hasta agora, Cañete apaez como comisariu d'I+D+i o de Tresportes, carteres consideraes de segunda división. De confirmase, ello significaría una perda de poder na UE d'España, qu'agora controla la poderosa cartera de Competencia, en manes de Joaquín Almunia, y enantes tuvo  al mandu d'Asuntos Económicos.

   Amás, la elección del ministru d'Economía, Luis de Guindos, como presidente del Eurogrupu, va retrasase siquier hasta xunu de 2015 porque l'actual titular del cargu, l'holandés Jeroen Dijsselbloem, dixo que piensa escosar el so mandatu.

   El xefe de gabinete de Juncker, l'alemán Martin Selmayer, dixo na so cuenta de Twitter que va haber "sorpreses" na nueva Comisión. "L'equipu de Juncker va ser un equipu fuerte, pero distintu de lo qu'esperen dalgunos. Les carteres axudíquense a persones, non a países", sollertó.

   La principal novedá del Executivu comuñal de Juncker va ser el nomamientu de cuatro supercomisarios ensin cartera, que se van encargar de coordinar les distintes árees polítiques, según publicó'l periódicu británicu 'The Guardian'. Los supercomisarios van ser los ex primeros ministros de Finlandia, Jyrki Katainen; Letonia, Valdis Dombrovskis; Estonia, Andrus; y Eslovenia, Alenka Bratusek.

   Katainen y Dombrovskis, abanderaos del rigor presupuestarios y aliaos d'Alemaña, van controlar l'área económica y van tar percima del comisariu d'Asuntos Económicos, que va ser el socialista francés Pierre Moscovici, según 'The Guardian'. Amás, va haber otros tres vicepresidentes con cartera, que van ser Mogherini, el ministru holandés d'Esteriores Frans Timmermans; y la viceprimer ministra polaca, Elzbieta Bienkowska.

   Escluyendo al luxemburgués, el nuevu Executivu comunitariu va cuntar con 18 homes y 9 muyeres, el mínimu qu'esixía la Eurocámara pa nun baltar a la Comisión.

   Un total de 13 de los 27 comisarios pertenecen al PP européu, a los qu'hai que sumar al tory británicu Jonathan Hill. Otros 8 comisarios son socialistes y los 5 restantes lliberales.

   Una vegada que Juncker faiga públicu el repartu de carteres, cada comisariu tendrá de sometese a un esame na Eurocámara na comisión parlamentaria que-y correspuenda. De siguío, el Parlamentu pronunciaráse sobre'l colexu nel so conxuntu nuna votación que ta prevista n'ochobre. Si cumple'l calendariu, el nuevu Executivu comuñal va empezar a trabayar el 1 de payares.