El voceru de Podemos Juan Carlos Monedero "apuntóse" l'abdicación del Rei Juan Carlos y l'arrenunciu d'Alfredo Pérez Rubalcaba como llogros de la so formación: "En Podemos llogremos munches coses, llogremos que'l Rei abdicare", dixo nun alderique televisivu en Cuatro recoyíu per Europa Press.
Según el so análisis, l'apaición de Podemos "aceleró'l procesu" d'abdicación del Rei, que se fixo con una llei que "tuvo prieses porque la posibilidá de que Podemos apaeciere nel Parlamentu torgaría la salida d'un Rei que tien que rindir munches cuentes".
Pa Monedero, la irrupción de Podemos llevó tamién a la dimisión del secretariu xeneral del PSOE, Alfredo Pérez Rubalcaba, y que'l PP "que ye pura casta, fale de rexeneración democrática".
Les sos palabres contesten al diputáu socialista na Asamblea de Madrid José Cepeda --xefe de la campaña de Pedro Sánchez a la Secretaría Xeneral del PSOE--, que-y pidió un pocu de "sensatez" y preguntóse si "too xira alredor de Podemos", y si "sal el sol pela mañana porque ta Podemos".
El representante de Podemos respondió-y qu'el so partíu foi'l "catalizador" d'una sociedá "que se cansó de la casta" y que "rompió "los candaos que torgaben faer ciertes entrugues".
Foto: WWW.JUANCARLOSMONEDERO.ORG
