El presidente de l'Autoridá de Comportamientu Financieru (FCA, poles sos sigles n'inglés) de Reinu Xuníu, John Griffith-Jones, anunció esti martes que se preparó un "plan de continxencia básicu" por si Escocia decide independizase nel referéndum del 18 de setiembre.
"Ficimos un plan de continxencia básica", dixo Griffith-Jones ante la Comisión d'Ayalguería del Parlamentu. Sicasí, el presidente esclarió que si Escocia s'independiza, seríen les instituciones escoceses les que decidiríen cómo regular el mercáu financieru.
El plan de continxencia del FCA inclúi "asegurase de que los teléfonos tán correctamente atendíos si hai llamaes pa facer entrugues". Griffith-Jones tampoco dio munchos más detalles del plan porque trabayar nello "volveríase complicao".
Un nuevu sondéu ellaboráu por TNS volvió a reflexar esti martes la gran igualdá esistente ente los unionistes y aquellos que deseen romper col Reinu Xuníu, a tan solo nueve díes del referéndum sobre la independencia d'Escocia --que se va celebrar el próximu 18 de setiembre--. Un 39 por cientu votaría 'Non' a la independencia y un 38 per cientu sofitaría'l 'Sí'. El pasáu domingu, un diariu británicu publicó una encuesta con resultaos similares.
