La tasa de desempléu de la Organización pa la Cooperación y el Desenvolvimientu Económicu (OCDE) rexistró en xunetu una medría d'una décima respeutu al mes anterior y asitióse nel 7,4%, según informó la institución con sede en París.
El númberu de paraos ente los 34 países miembros de la OCDE algamó en xunetu un total de 44,8 millones de persones, lo que, a pesar de suponer un descensu de 5,1 millones respeuto al máximu d'abril de 2010, entá representa 10,2 millones de paraos más qu'en xunetu de 2008.
Ente los países de la OCDE, la tasa de paru más eleváu correspondía a Grecia (27,2% en mayu), per delantre del 24,5% d'España y el 14% de Portugal.
Pela contra, Noruega (3,3% en xunu), Corea del Sur (3,4%), Xapón (3,8%) ya Islandia (4,4%) rexistraben los menores niveles de desempléu ente los miembros de la institución.
La tasa de paru femenín na OCDE asítiase en xunetu nel 7,5%, dos décimes penriba del nivel de desempléu masculín (7,3%). Pela so parte, la tasa de paru ente los menores de veinticinco año caltúvose estable nel 14,9%, lo que supón una baxada de 2,4 puntos porcentuales al respective de los máximos d'ochobre de 2009, anque ye entá 1,9 puntos más altu que'l nivel de xunetu de 2008.
"El desempléu xuvenil sigue siendo escepcionalmente altu en países como España (53,8%), Grecia (53,1% en mayu), Italia (42,9%), Portugal (35,5%) y Eslovaquia (31,7%)", indicó la institución.
