Los equipos investigadores d'Atapuerca (Burgos) y Xibraltar van collaborar nel estudiu de los Neandertales, según avanzó esti miércoles el codirector del Sistema Atapuerca, Eudald Carbonell, nel marcu del XVII Congresu Mundial de la Unión Internacional de Ciencies Prehistóriques y Protohistóriques (Uispp).
Nesti sen, esplicó, en declaraciones recoyíes por Europa Press, qu'esta llinia de collaboración científica ye gracies a la ideoloxía y interpretación crítica" de la Prehistoria de dambos equipos, atendiendo a los afayos neanternales descubiertos en dambos llugares.
Pela so parte, l'investigador del Muséu de Xibraltar Clive Finlayson destacó la importancia d'esta unión de conocencies, al considerar que nestos enclaves atópase l'empiezu y el final de los Neandertales".
Respecto al descubrimientu recién de la cueva Gorham de Xibraltar, Finlayson señaló que "ye un grabáu neandertal que demuestra intencionalidad" y señaló qu'el so calter non funcional "obliga a redifinir" parte de la Prehistoria.
Anque nun tien un significáu claru, destacó que'l grabáu descubiertu ye la resultancia de más de 200 trazaos y la so creación, fai unos 40.000 años, por aciu d'una ferramienta.
El grabáu sobre la roca amuesa, amás, qu'esa impresión reticulada representa la capacidá de los Neandertales pa la espresión abstracta, daqué que choca cola teoría que venceya l'arte colos humanos modernos.
La tercer xornada del Congresu Mundial de Prehistoria y Protohistoria centra les sos conferencies nel análisis y alderique de la complexidá de les sociedaes y compleméntase con visites a distintos llugares, como Güeyu Guareña (Burgos) y Numancia (Soria).
