Asturias (E.P.) .-El Principáu d'Asturies, Murcia y Andalucía son les comunidaes autónomes más "recataes" na práutica del nudismu, yá que namái ye posible facer esta práutica nel 4,95 por cientu (10 arenales), 3,96 por cientu (8 arenales) y 8,04 por cientu (32 arenales) de les sos sableres, respeutivamente, según los datos recoyíos pol buscador Playea.es.

   La mariña nacional cuenta con 399 sableres declaraes nudistes y otres 52 que tán identificaes como mestes, esto ye, arenales nos que conviven tanto naturistes como los que nun lo son. Con estes considerances, les fasteres ideales pa la práutica del naturismu atópense en Canaries, País Vascu y Baleares.

    L'Archipiélagu Canariu encabeza'l ranking naturista con 175 sableres nudistes, una cifra que dexa que nel 30,07 po cientu de los arenales canarios pueda prauticase'l naturismu. En segundu llugar atópase'l País Vascu, con un 29,85 por cientu de los sos arenales nos que pue esfrutase del bañu ensin ropa (20 sableres en total). Zarra la llista Baleares con 83 sableres nudistes, un 23,92 por cientu sobre'l total de los arenales de les islles.

   Según espliquen los fundadores de Playea.es, Ismael Requena y Ángel García nun comunicáu, "con esti ranking facilitamos a los asiduos de les zones naturistes los llugares nos que puen esfrutar d'una redolada más natural y con menos aglomeración de bañistes, yá que les sableres nudistes suelen tar más aisllaes y tienen un grau d'ocupación menor".

   Les sableres nudistes más grandes son les de Nueva Umbría en Lepe (Huelva) y El Cofete en Pájaras (Fuerteventura). La segunda d'estes tien 13,7 kilómetros de llargor de sables doraos. L'otru arenal atópase na provincia andaluza d'Huelva, na población de Lepe y la so estensión ye de 12 kilómetros.