Critica que naide-y pidió perdón y denuncia que los "insultos" que recibió prueben qu'hai práctiques autoritaries

Madrid (E.P.).-   El xefe de la delegación d'UPyD nel Parlamentu Européu, Francisco Sosa Wagner, llamentó que dende la dirección del partíu "insultárenlu" y calificárenlu de "mezquín" y "corruptu" por abrir l'alderique sobre la posibilidá d'aliase con otres formaciones como Ciudadanos, pa dempués acabar aceptando analizar la so propuesta.

   "Pa llegar ende nun faía falta llamame mezquín y corruptu", aseguró en declaraciones a Europa Press l'eurodiputáu d'UPyD, que la so formación celebra esti sábadu un Conseyu Políticu Estraordinariu pa falar precisamente de la propuesta que Sosa Wagner plantegó y que fizo que surdieren les crítiques de dellos dirixentes y cargos del partíu.

   Según l'europarlamentariu, el camín que decidió entamar agora la formación liderada por Rosa Díez ye'l "correctu" y "lóxicu", anque confesó que-y "dolieron enforma" les acusaciones que dellos dirixentes, como'l diputáu y responsable de Programa y Acción Política, Carlos Martínez Gorriarán, llanzaron contra él.

   Nesti sen, alvirtió qu'anque la dirección d'UPyD decidiera esplorar esta vía, quiciabes agora atoparánse colos r"eparos" d'otres formaciones que nun vean con bonos güeyos que se tachara de "corruptu" y "mezquín" al que fuera cabeza de llista d'UPyD nes pasaes elecciones europees.

   "Espero qu'eso nun sía asina y que les fuerces polítiques traten de pasar percima d'estos insultos. A min duelme enforma pero paso percima d'ellos porque la mio propuesta ye una propuesta política pol bien d'UPyD y, permítaseme la vanidá, pol bien d'España", manifestó.

   Nesti sen, defendió que la collaboración ente UPyD y Ciudadanos "pue ufiertar una fórmula perbona pa munchos ciudadanos que tán buscando mensaxes d'equilibriu, mensaxes moderaos y sensatos y non escentricidaes" como son les que proponen, al so xuiciu, "delles fuerces polítiques nel panorama políticu español".

   Según Sosa Wagner, la so propuesta tien un gran respaldu ente les bases d'UPyD, como-y tresmitieron los votantes de la formación al traviés de "los centenares" de cartes que recibe. "El domingu averáronseme en Bruxeles cuatro españoles mozos pela cai pa dicime: Tien usté razón, a ver si esto se consigue", matizó, pa insistir en qu'esti sentimientu ye "masivu".

"UN CERU N'EDUCACIÓN DEMOCRÁTICA"

   "Ye una pena qu'UPyD, que tuvo un 9 en tresparencia acordies con dellos estudios que se publicaron, tenga un 0 n'educación democrática", prosiguió l'eurodiputáu, qu'aseguró que, hasta agora, naide de la dirección del partíu se punxo en contactu con él pa esculpase. "Naide se dirixó a mi pa pidir esculpes polos insultos que recibí", repitió.

   Coles mesmes, l'eurodiputáu aseguró que la forma na que reaccionó la dirección del partíu énte la so propuesta, y el fechu de que nun s'espublizó dende les sos plataformes nin l'artículu que llevantó'l discutiniu nin nenguna de les sos esplicaciones posteriores, ye la prueba de qu'esisten eses "práctiques autoritaries" que Sosa Wagner denunció nel so testu.

   "Si nun esistíen eses práctiques autoritaries, yá se pudieron comprobar, pero eses práctiques esistíen con anterioridá", argumentó, pa matizar, sicasí, que al falar de práctiques autoritaries nun se refier a naide en concreto sinón al vezu habitual" que tienen les organizaciones de too tipu "d'agarrotase colos años".

   Énte esta situación, defendió que "ye bien bono qu'haya persones que de xemes en cuando ximielguen a eses organizaciones" y dígan-yos "dende'l ciñu" y "el compromisu políticu claro" --como aseguró que ye'l so casu-- que "nun van pel bon camín". "Y dizlo una persona que nun tien nengún interés políticu concretu porque nun me voi presentar nunca más a elecciones nin internes nin esternes nin de nenguna otra categoría", confirmó.

   "Tendría d'estimase que daquién dende'l ciñu ximielgue a la organización y lo diga. Pero esto nun asocedió asina. Siguen faltándome", llamentó.