Un total de 223 persones morrieron nes carreteres na Operación Branu, esplegada pola Dirección Xeneral de Tráficu (DXT) nos meses de xunetu y agostu, lo que representa un descensu del cuatro por cientu respecto al mesmu periodu de 2013, según señaló'l ministru d'Interior, Jorge Fernández Díaz, que fixo un balance positivu d'estes cifres ensin querer cayer na "autocomplacencia".
Fernández Díaz destacó que nesti branu finaron 10 persones menos que nel periodu braniegu de 2013, cuando s'algamare una cifra "récord" n'amenorgamientu d'accidentes que foi superada pol datu d'esti branu, yá que representa la cifra más baxa desque hai serie histórica estadística dende l'añu 1960, cuando hubo 279 muertos.
Nesa dómina, recordó qu'había poco más d'un millón de vehículos nel parque automovilísticu y dos millones de conductores, frente a los más de 31 millones de vehículos y los 26 millones de conductores qu'hai anguaño. En cuanto al númberu de mancaos, indicó que se rexistraron 982, frente a los 1.097 rexistraos nel mesmu periodu del añu anterior.
Por too ello, el ministru amosó la so "allegría" pol amenorgamientu "ensin qu'eso quiera dicir autocomplacencia", n'alusión a les 223 víctimes mortales que "son 223 traxedies personales".
Per otru llau, indicó que, de xineru a agostu de 2014, morieron nes carreteres españoles un total de 730 persones, siete más que nel mesmu periodu de 2013. En tol 2013, rexistráronse un total de 1.134 muertos nes carreteres españoles.
Foto: Consorcio Provincial de Bomberos.
