El ministru de Facienda, Cristóbal Montoro, alvirtió esti martes al expresidente de la Generalitat Jordi Pujol de que la so responsabilidá cola Facienda pública nun acaba nun comunicáu y de que tien cuenta d'actuar nel so casu pela vía alministrativa y la xudicial, porque a la vista de les informaciones conocíes nun pue refugase "que se cometieren dellos delitos".
"Si creía que pidiendo perdón públicamente faíase borrón y cuenta nueva equivocóse dafechu", dixo Montoro, amestando que la obligación del Ministeriu ye persiguir el fraude fiscal cometa quien lo cometa, y independientemente del so poder "económicu, mediáticu o políticu".
Énte la Comisión de Facienda del Congresu, onde comparez pa falar d'esti casu y de la evolución xeneral de la llucha contra'l fraude fiscal, el ministru refirióse al casu de Pujol como "unu de los más graves casos de fraude fiscal en términos cualitativos d'España".
Y precisó que si pue falar del casu ye porque, como asocedió col extesoreru del PP Luis Bárcenas, l'interesáu fixo pública la so situación tributaria, de manera que "nun busquen l'amparu de confidencialidá" qu'ufierta a los ciudadanos la Llei Xeneral Tributaria.
