Asina, de los datos despréndese una tendencia al alza nel gastu n'educación de les families dende 2010, cuando la media foi de 765 euros, con una medría media añal superior al 10 per cientu.

   L'estudiu contempla los gastos d'estes families n'educación infantil y primaria, en secundaria --incluyendo bachilleratu y graos profesionales--, universidá y superior, llibros de testu y comedores escolares.

   Per comunidaes autónomes, les families que destinaron más dineru en 2013 a la educación fueron les madrilanes, con una media de 1.635 euros --320 euros más por casa respeutu al añu anterior--, siguíes poles navarres y catalanes, que destinaron alredor de 1.450 euros.

   Concretamente, les cases que notaron más los costos d'educación fueron los murcianos, qu'en 2013 destinaron a esta partida casi un 60% más que l'añu anterior, pasando d'una media de 400 euros en 2012 a los 635 euros de 2013. Coles mesmes, el gastu de les families gallegues medró un 37% pasando de los 735 euros de 2012 a los 1.000 euros de 2013.

   Per otru llau, el gastu n'educación de les families estremeñes foi de 350 euros, una tercer parte de la media estatal, siguíes poles rioxanes con un gastu mediu de 470 euros.

   Amás de los gastos de matriculación y les cuotes escolares, los llibros de testu son una de les partíes de gastu más importantes del presupuestu escolar. En 2013, les cases españoles gastaron de media 340 euros en llibros, un 0,6% menos que l'añu anterior.

   Les comunidaes que más gastaron en llibros de testu fueron la Comunidad Valenciana, onde la media xubió a 550 euros, y Castiella-Lleón, con un gastu de 515 euros. Nel otru llau, Estremadura, Canaries y Castiella-La Mancha fueron les que menos dineru desembolsaron pa esti fin.

   Amás, nel estudiu vese qu'un 20% de les families utilizó en 2013 los comedores escolares gastando de media 405 euros, un 4,5% más qu'en 2012. Concretamente, les families catalanes gastaron 710 euros, casi'l doblu de la media nacional y 22 vegaes más que les families d'Estremadura, onde'l gastu supunxo unos 32 euros.

   Atendiendo al nivel d'estudios, el gastu en formación universitaria, medró cerca d'un 15% de media n'España. Esta medría ye mayor si se ve la evolución del gastu dende 2010, con un aumentu cercanu al 75%. Asina, si en 2010 la media de gastu n'educación universitaria yera de 410 euros, en 2013 superó los 710 euros.

   Por autonomíes, dir a la universidá sal-yos más caru a los valencianos, que tienen un gastu añal mediu de más de 1.500 euros, a los navarros, con un gastu de 1.300 euros y a los catalanes, con un gastu de casi 1.100 euros. Pela so parte, los estremeños pagaron 200 euros en 2013. Mientres, los asturianos esperimentaron un descensu de 640 euros al respeutive de 2012.