Tres del gritu de les masacres impónse’l silenciu del terror. El realizador americanu Joshua Oppenheimer vuelve retratar el xenocidiu indonesiu de 1965 en “La mirada del silenciu”, l’únicu documental que compite pol Lleón d’Oru en Venecia, pero esta vuelta pon el focu nes víctimes.

Si “The Act of Killing”, finalista a los öscar en 2013, estremeció a mediu mundu colos grotescos testimoños de los autores materiales del progromu comunista que dexó nes cunetes a un millón d’indonesios, “The Look of Silence” ufre la otra cara de la moneda, la de los supervivientes traumatizaos pa siempre.

Ún d’ellos, Adi Rukun, protagonista del filme, asistió a la presentación del documental nel Festival de Venecia, acompañando al so director. Rukun enfréntase cara a cara na película, y ensin perder la calma nin un instante, a varios llíderes de los escuadrones de la muerte, incluyíu’l que matara xavazmente al so hermanu cuando él entá nun naciera.

“Esta película nun pue curar a la mio familia depués de lo que sufriera”, dixo Rukun, que trabaya nel so país vendiendo gafes de puerta a puerta. “Pa los qye tamos vivos, namás la muerte va acabar col nuestru trauma. Pero sí pue sirvir a los mios fíos y a xeneraciones futures. Namás quería que los asesinos supieran y almitieran que lo que ficieron tuviera mal, pa se quién a perdonalos, a vivir xuntos y acabar con esos sentimientos de miéu y sospecha mutua ente vecinos colos que vivimos”.

Ambiciosu propósitu nun país nel que falar del pasáu ye tabú y nel qu’enxamás hubo xuicios nin comités de la verdá, talo y como cuenta’l documental.

Por mor de la repercusión internacional del so anterior trabayu, qu’obtuviera, ente otros, el premiu BAFTA al meyor documental y el de l’Academia del Cine Européu, Oppenheimer fuera declaráu persona non grata n’Indonesia y nun pue vorver al país asiáticu.