Éstos son los puntos claves del acuerdu revelaos por responsables israelinos y palestinos:

PASOS INMEDIATOS:

   - Hamás y les otres estayes armaes palestines en Gaza acceden a suspender el llanzamientu de cohetes y proyectiles de morteru contra Israel.

   - Israel va cesar toles sos acciones militares, incluyíos los bombardeos aéreos y les operaciones terrestres, en Gaza.

   - Israel acceder a abrir más los sos pasos fronterizos con Gaza col fin de facilitar el fluxu de bienes, incluyida ayuda humanitaria y equipu de reconstrucción, a la Franxa. Esto tamién formaba parte del acuerdu d'altu'l fueu tres l'últimu conflictu ente Israel y Hamás en noviembre del 2012, pero nunca se cumplió íntegramente.

   - Nun acuerdu separáu y billateral, Exiptu accede a abrir los sos 14 kilómetros de frontera con Gaza en Rafá.

   - L'Autoridá Palestina, liderada pol presidente Mahmud Abbas, prevése qu'asuma la responsabilidá d'alministrar les fronteres de Gaza de manes d'Hamás. Israel y Exiptu esperen que va garantizar que nun entren en Gaza armes, munición y cualquier material de "doble usu".

    Coles mesmes, esperen un siguimientu estrechu de les importaciones de material de construcción como cementu y fierro fundío p'asegurar que s'usen pa reconstruyir o construyir viviendes y non túneles que puean usase p'atacar a Israel.

   - L'Autoridá Palestina va liderar la coordinación de los esfuerzos de reconstrucción en Gaza colos donantes internacionales, incluyida la Unión Europea, Qatar, Turquía y Noruega.

   - Israel ta previsto qu'estreche la zona de seguridá sobre la Franxa, pa que pase de los 300 metros actuales a los 100 metros si caltién la tregua. Esta midida va permitir a los palestinos más accesu a terrenos agrícoles próximos a la frontera.

   - Israel va ampliar la llenda de pesca frente a la mariña de Gaza hasta les seis milles dende los trés actuales, cola posibilidá d'amplialu gradualmente si caltién la tregua. A lo último, los palestinos quieren tornar a les 12 milles permitíes internacionalmente. Esto tamién formaba parte del anterior altu'l fueu del 2012, y aplicóse nun plazu cortu de tiempu antes de rescindise en marzu del 2013.

CUESTIONES PA DEBIR A LLARGU PLAZU:

   - Hamás quier qu'Israel llibere a cientos de prisioneros palestinos deteníos en Cixordania tres el secuestru y posterior asesinatu de trés mozos israelinos en xunu, un ataque que llevó al actual conflictu. El Movimientu de Resistencia Islámica negó de primeres tener nada que ver con estes muertes, pero un altu cargu de Hamás nel exiliu en Turquía almitió la selmana pasada que'l grupu cometió l'ataque.

   - El presidente Abbas, que lidera'l partíu Al Fatá, quier que se ponga en llibertá a los prisioneros palestinos de llarga data pa los que se suspendió la lliberación, tres fracasar les conversaciones de paz ente Israel y l'Autoridá Palestina.

   - Israel quier qu'Hamás y otros grupos milicianos en Gaza entreguen tolos restos y efectos personales de soldaos israelinos muertos mientres la operación 'Marxe Protector'.

   - Hamás quier que se construya un puertu marítimu en Gaza, que permita la entrada y salida del enclave de bienes y persones. Israel refugó dende va tiempu esti plan, pero ye posible que puea avanzase nel mesmu si hai garantíes absolutes de seguridá. D'antiguo, Gaza yera un importante puertu nel Mediterraneu Oriental, un puntu clave nel comerciu d'especies. Dende que se firmaron los Acuerdos de Paz de Oslo nos 1990, existieron planes pa la so construcción.

   - Hamás quier que se desbloquien los fondos conxelaos pa poder pagar a 40.000 policíes, trabayadores gubernamentales y otru personal alministrativo que lleven sin recibir el so salariu dende últimos del añu pasáu. Los fondos conxelólos l'Autoridá Palestina.

   - Israel dixo nes últimes selmanes que quier la plena "desmilitarización" de Gaza. Estaos Uníos y la Unión Europea apoyaron esti oxetivu, pero nun ta claro qué significaría na práctica y Hamás refúgalo por impracticable. Cabe la posibilidá qu'Israel lo plantege otra vuelta a midida qu'avancen les conversaciones.

   - Los palestinos tamién quieren que se reconstruya l'aeropuertu de Gaza, l'Internacional Yasir Arafat, qu'abrió en 1998 pero zarróse nel 2000 tres bombardialu Israel.