La maxistratura francesa abrió una investigación formal por presunta neglixencia de la exministra de Finances de Francia y actual directora xerente del Fondu Monetariu Internacional (FMI), Christine Lagarde, nel marcu d'un casu de fraude políticu nel país, según reveló una fonte próxima a la exministra gala, esclarando qu'ésta nun cuenta dimitir.
Les fontes consultaes indicaron que Lagarde, a la qu'antes preguntáren-y como testigu los maxistraos en París, consideró infundada la decisión d'investigala por "presunta neglixencia" y va apelar. Una fonte xudicial francesa confirmó tamién esti pasu.
Según la llexislación francesa, los xueces ponen baxo investigación formal a daquién cuando creen qu'existen nicios d'una mala actuación, anque eso nun implica qu'a lo último se celebre un xuiciu.
Hasta la fecha, la investigación rellacionada col magnate francés Bernard Tapie implicó a dellos miembros del Gobiernu de Nicolas Sarkozy, incluyendo a Lagarde.
A Tapie, qu'emprestó apoyu a Sarkozy nes dos últimes elecciones, compensáronlu con 403 millones d'euros por un arbitraxe celebráu nel 2008 baxo la presidencia de Sarkozy pa resolver la disputa abierta con Credit Lyonnais, entidá entós controlada pol Estáu. Lagarde yera la ministra de Finances del Gobiernu francés naquel momentu.
