Los trabayadores sanitarios qu'atienden a los infectaos pol ébola son consideraos un grupu d'altu riesgu. Ente ellos, la OMS reconoció qu'hai riesgu de que los trabayadores de la organización puean contrayer la enfermedá y aseguró que se tomen toles midíes necesaries p'asegurar la protección d'aquéllos que tán esplegaos sobre'l terrén.

   Nel so comunicáu, la organización llamentó que la enfermedá causara la muerte de "importantes doctores en Sierra Lleona y Liberia, dexando a estos países non solo sin profesionales esperimentaos y dedicaos, sinón tamién sin inspiradores nin héroes nacionales".

   "Dellos factores espliquen la elevada proporción de trabayadores sanitarios infectaos, ente los que s'inclúin la insuficiencia d'equipamientu protector o'l so mal usu, la insuficiencia de personal pa un biltu tan grande, y la compasión, que provoca que'l personal trabaye más hores de les consideraes segures", valoró.

   Asina, dixo que "nel pasáu, los biltos d'ébola yeren visibles una vez que la tresmisión amplificábase y los doctores y enfermeres contaxábense, tres lo que s'identificaba'l virus y tomábense midíes, menguando los casos ente'l personal sanitario", de la que recordó que "la mayoría de los biltos recién tuvieron llugar en zones remotes y con cadenes de tresmisión fáciles de detectar".

   "L'actual biltu ye distintu. Les capitales y les zones remotes tán afectaes, elevando les posibilidaes de qu'haya casos sin diagnosticar en contactu col personal sanitario. Nin los médicos nin el públicu conocen bien la enfermedá, y hai un intensu mieu en pueblos y ciudaes", añadió.