Madrid (E.P.) .-El Grupu Popular pidió esti martes nel Congresu al restu de formaciones polítiques qu'esperen a conocer la propuesta que previsiblemente va llevar a la Cámara Baxa en setiembre pa reformar la llei electoral y modificar el sistema d'elección de los alcaldes, antes d'entrar en "descalificaciones" y pidir cuentes al presidente del Gobiernu, Mariano Rajoy.

   Asina lo manifestó'l diputáu popular Pedro Gómez de la Serna na Diputación Permanente mientres la so intervención nel debate sobre'l pidimientu de comparecencia urxente de Rajoy, pa esplicar esti asuntu, solicitada pol Grupu Socialista, Izquierda Plural (IU-ICV-CHA) y el Grupu Mistu, y qu'apoyaron el restu de formaciones de la oposición.

   "Piden la comparecencia urxente nuna cuestión que nin el presidente del Gobiernu nin nengún miembru pronuncióse de manera clara, nel sen de que nun punxo sobre la mesa un modelu concretu. Yo quiero tresllada-yos la voluntá del Gobiernu de presentar nel so momentu una fórmula abierta", esplicó'l diputáu.

   Asina, Gómez de la Serna mostróse "ablucáu" ante les descalificaciones feches polos grupos de la oposición sobre una reforma que'l PP tovía nun llevó al Congresu. "En setiembre igual la presentamos nel marcu de les midíes de rexeneración", avanzó.

   Coles mesmes, el diputáu del PP defendió que la intención del PP de reformar la llei electoral pa "garantizar la gobernabilidá de los conceyos, respetar la voluntá mayoritaria" y "evitar los golpes d'estáu tapecíos del día dempués" nun la inventaron "agora de la nueche al día" sinón que la llevaron nos sos programes electorales "dende'l 2003".