El PSOE de Xixón pidió esti llunes al Conceyu de Xixón qu'anule la sovención de 40.000 euros concedida pol Conceyu a los Cursos del Palaciu de la Granda (Gozón) del añu 2013, en casu de que tovía nun s'abonara, y que retire la que yá ta aprobada, cola mesma cuantía, pa la edición del 2014. Los socialistes remitiéronse a un informe del interventor municipal pa señalar qu'esta actividá nun tien nada que ver col conceyu de Xixón y pa cuestionar tamién el rigor d'unos gastos que consideraron escesivos.
Nuna rueda prensa, la conceyala Begoña Fernández fizo públicos los documentos del espediente de la sovención pa la edición del 2013 al que tuvo accesu'l PSOE, y qu'inclúin un informe de la intervención municipal con una serie d'encamientos que la conceyala socialista resumió: "tien que xustificase l'interés social, público humanitario o económico de l'actividá, y que la entidá organizadora nun tenga la obligación de sometese a una concurrencia pública".
Fernández cree que la segunda condición nun se cumple, puesto que "la entidá a la que se concede l'ayuda ye una empresa, una comunidá de bienes constituyida en Taracón (Cuenca), 18 díes antes del entamu de los cursos del 2013, (del 29 de xunetu al 30 d'agostu del 2013) por namás dos miembros: Juan Velarde -director del eventu- y la so muyer". "Nun tien sede n'Asturies y el so únicu oxetu social ye la realización de los cursos", añadió la conceyala pa considerar que se trata de "una empresa y poro tien que sometese a concurrencia pública".
Amás, critica que nengún de los ponentes s'agospió en Xixón y que nengún cursu ofrecióse en Xixón. De la estructura de los gastos de la cita (con una cuantía total de 166.000 euros de los que'l Conceyu aporta 40.000), apunta que toles factures van a nome del Hotel Palaciu Ferrara d'Avilés (de cinco estrelles) y que d'ellos, 71.000 destináronse a gastos de caltenimientu, qu'inclúin la contratación de "una gobernanta, cuatro camareres de pisos, dos telefonistes-recepcionistas, un 'maitre', trés camareros, un xefe de cocina, dos ayudantes de cocina y un xefe de compres".
A xuiciu de Fernández, "nun ta xustificada l'aportación municipal de 40.000 euros, como tampoco lo ta l'aportación de 40.000 que fai'l Ministeriu de Trabayu". Recordó qu'a lo llargo del presente añu, "nel Conceyu tuvieron suspendíos la mayor parte de los programes d'empléu y sovenciones a entidaes sociales, col argumentu de l'alcaldesa de que l'interventor nun diba autorizar gastos en competencies que nun yeren propies del Conceyu". Y agora, "con un informe del interventor concede sin problema una sovención de 40.000 euros a esta entidá, comunidá de bienes Cursos de La Granda".
Critica tamién a la ministra de Trabayu, Fátima Báñez, "que fizo bien de recortes, y que nun tendría d'aprobar una sovención de 40.000 euros p'acondicionar un palaciu por importe de 71.000 euros". .
