Hollande recibió esti llunes pela mañana a Valls y encargó-y conformar un equipu acorde "coles orientaciones definíes pal país". La so composición "va anunciase esti martes", cuando va conocese l'algame de la remodelación.

   Valls, antiguu ministru del Interior, asumió la xefatura del Executivu'l 31 de marzu d'esti añu, nel marcu d'unos cambios aceleraos polos malos resultaos del Partíu Socialista nes elecciones llocales y cola popularidá del presidente en mínimos históricos.

   La nueva crisis llega tres les desacreditaciones públiques realizaes por dellos ministros sobre la política del Gobiernu. El responsable d'Economía, Arnaud Montebourg, y el d'Educación, Benoît Hamon, discreparon públicamente'l fin de selmana de l'actual rumbu del Executivu.

   Montebourg volvió defender esti llunes la necesidá de promover polítiques de crecimientu alternatives a l'austeridá. "Creo que'l debate nun ye d'autoridá, sinón d'orientación económica", dixo nuna entrevista cola emisora Europe 1.

   Los medios galos recoyíen esti llunes el supuestu malestar de Valls con Montebourg y el mesmu ministru dixo "inorar" si siguiría nel cargu'l martes, primero que s'oficilizare la inminente remodelación.

   Sicasí, llanzó un mensaxe: "nun creo que puea castigase a un ministru que contribúi al discutiniu (...). Nun me paez que se puea estremar a naide pola única razón de dar propuestes a un debate xustificao".

Foto: wikipedia.