Los hermanos Eduardo, Hernán, Jorge y Luis Hernández, xunto col so primu Óscar Lara, vivieron esi momentu especial na so carrera acompañaos por un nutríu grupu de familiares pa los que tuvieron d’alquilar un autobús. Consiguen ser el primer grupu de música popular mexicana que consigue una estrella nel Paséu de la Fama.
Los incondicionales de la banda animaron l’eventu nel bulevar de Hollywood, onde vitorearon a los sos ídolos, entonaron delles de les sos lletres más conocíes y, los más afortunaos, fueron quién a facese colos sos autógrafos.
“Ye una fazaña, un llogru bien guapu pal grupu”, comentó Jorge Hernández nuna recepción posterior al actu de presentación de la estrella que tuvo llugar na sala de conciertos Avalon y na que los músicos festexaron el so éxitu, de forma más distendida, xunto con 200 persones.
La estrella de Los Tigres del Norte ye la númberu 2.527 del Paséu de la Fama y quedó instalada mui cerca d’onde s’alcuentren les d’otros carismáticos artistes de la música mexicana, como Pepe Aguilar, Juan Gabriel, Luis Miguel y non mui llueñe de la qu’en 2010 recibiera Marco Antonio Solís.
La banda norteña acumuló méritos pa esti homenaxe durante les sos cuatro décades de vida nes que ganaron seis premios Grammy y otra media docena de Grammy llatinos, grabaran más de 500 canciones y vendieran 37 millones de discos.
Los Tigres del Norte tomaron partíu pola reforma migratoria y participaron recientemente en marches en Washington pa pidir respetu al inmigrante.
