Andecha Astur convoca pal sábadu 30 d'agostu al  actu d'homenaxe a la Declaración de Soberanía cola que'l Conseyu Soberanu declaraba la independencia de la República española.

El sábadu 30 d'agostu, nel Puertu Tarna, a la 1 del meudíi,  tendrá llugar el tradicional actu de comemoración y homenaxe a la Declaración de Soberanía del Conseyu Soberanu por mor de la qué se declaró independiente de la República Española y col qu'entamó un auténticu procesu revolucionariu y de reconocencia a nivel internacional que defendió heróicamente coles armes frente a un exércitu franquista y los sos alliaos alemanes.

Güei, cuanu l'Estáu español continúa col procesu d'asimilacionismu y negación de la identidá nacional asturiana y de los nuesos drechos colleutivos, y cuandu la izquierda española n'Asturies pretende garrar fuercia con proyeutos estatalistes importaos dende Madrid y nos qu'Asturies nun ye más qu'una sucursal ensin reconocencia de la so identidá nacional y soberanía, Andecha Astur fai un llamamientu al conxuntu de la sociedá asturiana a recuperar aquellos valores que llevaron al Pueblu Asturianu a asumir les riendes del so propiu destín y a lliberase de proyeutos españolistes que torguen la mesma sobrovivencia d'Asturies comu nación. 

Andecha Astur considera perimportante participar na reivindicación d'esa fecha y esi fechu hestóricu, dientru d'una dinámica de recuperanza de la nuesa soberanía comu Pueblu, del nuesu drechu a decidir llibre y democráticamente'l nuesu futuru ensin más llendes que les que voluntariamente querramos ponemos, llibres de xugos ya imposiciones españolistes.

L'actu cellebraráse'l prósimu sábadu 30 d'agostu nel Puertu Tarna, nel monolitu comemorativu de la Declaración de Soberanía.