Acaba fallecer el músicu y director coral asturianu Ramón Prada Vicente, padre del tamién músicu y compositor Ramón Prada.

Con una llarga traxectoria dedicada a la música coral nel oriente d’Asturies, Ramón Prada entamara estudiar solféu y piano a los 11 años colos PP Agustinos de la Vid, en Burgos. Malapenes con 15 años yá yera l’encargáu de dirixir les cuerdes de voces blanques de la so agrupación coral.

Dende 1957, añu nel que se fundara, vien dirixendo’l Coru Mixtu Peña Santa de Cangues d’Onís, que primero recibiera’l nome de Masa Coral Peña Santa y que surdiera del coru parroquial de la localidá.

En 1975 concedióse-y la Crus d’Alfonso X el Sabio. En 2005 la Federación de Coros d’Asturies (FECORA) concedió-y el Premiu Axuntábense y l’Ayuntamientu de Cangues d’Onís nomólu Fíu Predilectu, dándo-y el so nome a la cai na que vivía anguañu.

Cola so desaparición piérdese una de les referencies más importantes de la dirección coral nel oriente asturianu, pero tamién una de les cabeces visibles na organización de tou tipu d’alcuentros relacionaos cola música coral.