"Los bombardeos destruyeron seis vehículos militares multipropósitu Humvee, trés arsenales d'esplosivos, un morteru y dos camiones blindaos", detalló'l Pentágonu al traviés d'un comunicáu.

   Nel mesmu, afirmó que los ataques "lleváronlos a cabu n'apoyu a les fuerces de seguridá iraquines y les operaciones de les fuerces curdes, asina como pa protexer infraestructures básiques y al personal ya instalaciones d'Estaos Uníos".

   A lo último, el Departamentu de Defensa estaounidense dixo llevar a cabu un total de 84 bombardeos n'Iraq dende'l 8 d'agostu. Un total de 51 executáronse nel entornu de la presa.

   Los peshmerga, l'Exércitu de la rexón semiautónoma del Kurdistán iraquín, ficiéronse a última hora del domingu col control de la totalidá de la presa de Mosul col apoyu de l'aviación estaounidense.

   La presa de Mosul ye d'importancia estratéxica, dao que la so destrucción inundaría la ciudá de Mosul, la segunda más poblada d'Iraq y la crecida algamaría hasta a Bagdad.

   L'Estáu Islámicu --antes Estáu Islámicu d'Iraq y el Llevante (ISIS)-- proclamó a últimios de xunu'l Califatu Islámicu y nomó califa al so líder, Abú Bakr al Baghdadi. La nueva organización declárase Estáu independiente y reclama que tolos musulmanes del mundu xúren-y fidelidá.

   A partir d'esti momentu, llanzó numberoses campañes de venganza contra la comunidá chiína y otres comunidaes minoritaries de les zones que controla, como la cristiana y la yazidina, executando a miles de persones y destruyendo numberosos llugares de cultu.