El Gobiernu rusu actualizó la llista de productos que tará prohibío importar dende países qu'aplicaren mientres un añu pa escluyir del vetu dalgunos alimentos como la lleche sin lactosa o les pataques pa semar, coles mesmes qu'ampliaba les restricciones a los pexes vivos, con escepción del salmón.
El documentu sobre l'aplicación de midíes económiques especiales que garanticen la seguridá de la Federación de Rusia, firmáu pol primer ministru Dimitri Medvedev, modifica asina'l llistáu orixinal de productos vetaos dende'l pasáu 7 d'agostu, col fin de facilitar el suministru de productos dirixíos a persones alérxiques o con necesidaes especiales, asina como pa llendar la perda de competitividá de l'agricultura rusa.
Nesti sen, el Kremlin va autorizar la compra de productos de "lleche y productos lácteos sin lactosa", anque caltién el vetu a la importación de lleche y productos lácteos polo xeneral pa la UE, EEUU y el restu de países que de primeres sancionaron a Rusia.
Coles mesmes, Rusia va permitir entrar nel so mercáu pataques, maíz híbrido, arbeyos y cebolles, anque nel casu de toes estes hortolices namás va permitir la so importación namás pa la so sema nel país.
Per otru llau, tal como apuntaba la selmana pasada'l vizprimer ministru rusu, Arkadi Dvorkovich, nun va aplicase'l vetu a la importación de suplementos dietéticos, vitamines y suplementos minerales, asina como aditivos del sabor, concentraos de les proteínes (animales y vexetales), fibra dietético y suplementos nutricionales".
Sicasí, el Gobiernu rusu indicó que la prohibición d'importar pexes va aplicase tamién a los pexes vivos, cola escepción de la entrada de "críes de salmón del Atlánticu y la trucha".
