La poeta iraní y cadidata dos veces al Nobel de Lliteratura (1999 y 2002), Simin Behbahaní, conocida col nomatu cariñosu de “La Lleona d’Irán”, ta acabante morrer esti día a la edá de 87 años, según acaba informar el so fíu nes redes sociales.
La escritora venía sufriendo problemes cardíacos y respiratorios y afayábase ingresada en coma dende’l pasáu 6 d’agostu nel hospital Pars de la capital iraní, nel que morriera a primera hora d’esta pasada madrugada.
Fía d’escritores, aprendiera en casa l’amor a la lliteratura y al periodismu y entama a escribir poesía a los dosce años, publicando a los catorce’l so primer poema. A lo llargo la vida publicó más de seiscientos poemes, recoyíos en 19 llibros de poesía, dos collecciones de cuentos curtios, una biografía del so segundu maríu, el fallecíu Manuchehr Koushiar, u numberosos artículos lliterarios, ensayos y entrevistes.
Tamién compuso más de trescientos cantares pa dellos de los más destacaos cantantes iranís, renovando’l xéneru del ghazal, el más empleáu na poesía y na canción popular d’Irán y de bien d’otros países y pueblos averaos. D’ente los sos cantares más conocíos pue llocalizase al traviés d’internet el del cantante iraní Dariush, que diz asina:
“Voi refacete, patria
anque seya cola adoba de la mio alma.
Voi llevantar columnes pa sostener el to techu,
anque seya colos güesos míos.
Voi goler la flor en ti otra vuelta,
p’agradar a la xeneración más mozo.
Voi llimpiate’l sangre otra vuelta
col regueru de les mios llárimes.
Voi aportar otra vuelta un día de bien de lluz
y la escuridá va abandonar la casa.
Voi pintar los mios versos
del azul del cielu nuestru
y anque lleve un cientu d’años muerta
voi permanecer arrecha sobre la mio tumba
p’aventar un gritu talu
que destroce’l corazón del diañu…
