Xerusalén (E.P.) .-Polo menos 22 palestinos morrieron, ente ellos seis neños, dende qu'Israel volvió a entamar esti martes los bombardeos sobre la Franxa de Gaza en respuesta al llanzamientu de cohetes dende esti enclave contra'l territoriu israelín, según l'últimu balance ofrecíu esti miércoles pol voceru del Ministeriu de Sanidá gazacín, Ashraf al Qidra, citáu pola axencia Maan.

   Dende qu'Israel llanzó'l pasáu 8 de xunetu la operación 'Marxe Protector' na Franxa de Gaza, más de 2.040 palestinos perdieron la vida y más de 10.200 resultaron firíos, según los datos de les autoridaes del enclave, controláu por Hamás.

   Según Al Qidra, dos menores de 16 y 11 años morrieron nun bombardéu aereu en Deir al Balá, nel centru de la Franxa,  mientres qu'otros seis palestinos resultaron firíos n'otru ataque n'Al Mughraqa. Amás, nes últimes hores morrió un home firíu n'otru bombardéu previu.

   Amás, de los restos de la casa de la familia Al Dalu na ciudá de Gaza sacáronse los cuerpos sin vida d'un neñu de 14 años y d'otru miembru de la familia, según el voceru, que de primeres informara de la muerte d'una muyer y un neñu nesti mesmu llugar. Per otra parte, una neña de dos años morrió nun bombardéu nel barriu gazacín d'Al Zaytoun.

   Ún de los bombardeos de l'aviación israelina que tuvo más ecu foi'l cometíu anueche contra la vivienda de Mohamed Deif, el cabezaleru del brazu armáu d'Hamas, les brigaes Ezzedin al Qassam. Nél morrieron la muyer y el fíu del comandante milicianu.

   Según informó l'Exércitu israelín, dende qu'entamó la tregua esti martes los milicianos palestinos llanzaron polo menos 137 cohetes contra territoriu israelín, sin que pel momentu se produxeren víctimes.