Nuna visita n'Eivissa, Sánchez señaló que-y indigna la corrupción y lo que va facer ye ser "implacable colos casos de corrupción" qu'afecten, "por desgracia", al so partíu. "Voi encargame de llimpiar les mazanes podrecíes qu'haya nel cestu de la política", dixo.

   Sánchez aseguró que les persones señalaes" pola xueza Alaya nel casu de los ERE tovía nun tán imputaes y valoró que Chaves y Griñán espresaren la so voluntá de declarar ante'l Supremu. "Dexemos que la Xusticia actúe", sorrayó.

   Coles mesmes, aseguró que la presidenta de la Xunta d'Andalucía, Susana Díaz, "actuó con contundencia y reaccionó con contundencia".

   El líder del PSOE refirióse a les palabres del exconseyeru d'Empléu de la Xunta y exsecretariu xeneral del partíu en Sevilla, el diputáu José Antonio Viera, preimputáu nel casu de los ERE y qu'esti martes aseguró que cuenta col apoyu de Sánchez. "Al señor Viera conózolu porque ye diputáu y tuve delles conversaciones con él. Como secretariu xeneral, nun ye que confíe, ye qu'espero que seya inocente y ehí lu dexo", dixo Sánchez.

   "Dende'l PSOE lo que nun vamos facer ye condenar a inocentes nin defender a culpables. Vamos dexar que la Xusticia actúe y a partir d'ello, vamos tomar les decisiones oportunes. Si me pregunta por Chaves o Griñán, yo dígo-y que defendo la so honestidá y honorabilidá", insistió.