Según esplica la mesma organización, los golpes danlos tanto militares marroquinos uniformaos como guardias civiles y asoceden en suelu español, nel pasiellu ente la doble valla que delimita la frontera, sin que s'aprecie mientres la grabación que los migrantes ofrezan resistencia.

   El videu, fecháu a les 04.20 hores del día 13, recueye cómo se conduza hasta a seis inmigrantes unu a unu y a golpes per una decena d'axentes a lo llargo d'esi pasiellu hasta la puerta de serviciu de la valla.

   Trés d'estos axentes, ubicaos cerca de la puerta, solmenen pataes y golpes colo que paez una porra a los estranxeros que van pasando. Obsérvase cómo unu d'ellos pega un porrazu nel llombu d'una persona qu'acababa de cruzar acoxando la llenda que conduz a Marruecos.

   Una vez cruzada la puerta, a los migrantes recíbenlos con más golpes. El movimientu de la llinterna dexa ver con claridá a un axente marroquín uniformáu dando con una porra sobre los que van pasando, asina como a dellos axentes vistíos de antidisturbios que Prodein identifica cola Guardia Civil.

   Col espardimientu d'esti nuevu videu la organización sal al pasu de les postures espresaes esti llunes pola Delegación del Gobiernu en Melilla, institución dirixida por Abdemalik El Barkani, que criticó esti tipu de grabaciones por considerar que "son parciales" y "busquen la controversia".

   Les declaraciones producíense hores dempués de que la organización internacional Human Right Watch publicara dos grabaciones pa ilustrar, per un llau, qu'hubo violencia policial sobre los migrantes nel saltu a la valla del pasáu 13 d'agostu y, per otru, que se volvieron a executar devoluciones sumaries a Marruecos de persones que llograron algamar suelu español.

Foto: PRODEIN.