Andecha Astur llama a participar nel manifestamientu antitaurín d'esti domingu en Xixón y acusa al Ayuntamientu de cobardía istitucional por nun finar cola Feria Taurina de Begoña.
Andecha Astur llamenta fondamente que l'Ayuntamientu Xixón esculpiara'l valiente xestu de prohibir les clases de toréu pa neños que cuntaben impartise na Playa San Llorienzu, escudándose en problemes d'espaciu y xestión en cuentes d'afrontar la necesidá de finar con semeyante espresión españolista de crueldá, dexando de collaborar económica y publicitariamente colos eventos taurinos en Xixón, poniendo'l gobiernu de Foro al mesmu nivel que los anteriores del PSOE-IU en cuantes a falta de respetu a los drechos de los animales y collaboracionismu con esa espresión d'incultura y crueldá tan contraries a la sensibilidá y cultura asturiana y tan vinculada al más ranciu españolismu.
El manifestamientu, convocáu por Anadel col sofitu d'Asturies Antitaurina tendrá llugar el prósimu domingu 17 d'agostu a les 16:30 na Plazuela San Miguel, y Andecha Astur llama a la participación nel mesmu, dientru'l bloque soberanista que ta encadarmándose a tal fin.
