“Voi retalos? ¿Cámbiolo too? Lluché escontra esa posibilidá y llegué a la conclusión de que cambialo too diba ser un desastre, porque les pistes taben ellí”, dixo l’autor de la saga más exitosa de la televisión, “Game of Thrones” –n’España, “Juego de Tronos”.

L’escritor americanu George R.R. Martin, autor de la saga de llibros “Canción de hielo y fuego”, na que ta inspirada la serie de televisión “Juego de Tronos” –de la que tamién ye’l guionista- confesó que dos llectores xuntaron les pistes dexaes ne sos noveles y llograron aldivinar el que va ser el final de la hestoria.

“A mi préstame sorprender a los mios llectores. Como llector yo tarrezo la ficción predecible. Y yo nun quiero escribir una novela de ficción que seya predecible. A mi préstame sorprender a los llectores y llevalos per caminos que nun veíen venir. Al menos ún o dos llectores llugraron amestar les pistes escures y sutiles que dexé llantaes nos mios llibros y llograron la solución correcha”, confesó Martin nel Festival Internacional de Lliteratura d’Edimburgu.

“Juego de Tronos” ye una novela de fantasía entamada en 1996 y ganadora del premiu Locus en 1997. Trátase de la primera entrega de la serie de gran popularidá “Canción de hielo y fuego”. La novela caracterízase pol usu de numberosos personaxes bien detallaos, la contraposición de puntos de vista de los múltiples protagonistes, la so trama con xiros inesperaos y un usu sutil y moderáu d’aspectos máxicos tan comunes n’otres obres de fantasía.

La novela trescurre nun mundu fantásticu con reminiscencies de la Europa de la Edá Media nel que la maxía y les criatures mítiques del pasáu quedó nel olvidu. Nel continentes del Poniente, onde les estaciones duren décades y los iviernos son siempre duros, acércase’l final del llargu branu. Pocos años depués de la revuelta que punxera fin al reináu de la dinastía Targaryen, Robert Baratheon, que llideró a los nobles rebeldes xunto con Edaard Stark, ocupa agora’l tronu de fierru de los siete reinos. Con too, les pugnes pol poder ente les principales cases nobiliaries salen cada vez más abiertamente a la lluz. Amás, inquietantes sucesos acontecen nel norte, más allá de la xigantesca muria que separta los siete reinos de les tierres xavaces. Too fai oensar que l’equilibriu en Poniente ta a puntu de rompese.

En televisión acaba de pasase la cuarta temporada, convirtiéndose na saga con más grande númberu de siguidores y creando tres d’ella una verdadera llexón d’adictos, que lleen de mano los llibros segíun van saliendo y que depués siguen los capitulos televisivos. Esisten munches variantes del posible final de la saga, d’ehí la sorpresa del comentariu del so autor de que, al traviés de les pistes dexaes nos llibros, dalgún llector yá diera col posible acabu d’ella.