Roma (E.P.) .-La ministra d'Asuntos Esteriores italiana, Federica Mogherini, confirmó la muerte del fotoperiodista Simone Camilli na Franxa de Gaza, de la qu'aseguró que'l so fallecimientu supón "una traxedia" pa toa Italia.

   "La muerte de Simone Camilli ye una traxedia pa la so familia y pal nuesu país", aseguró la xefa de la diplomacia italiana, nun comunicáu publicáu pol so departamentu. "Una vez más, un periodista paga'l preciu d'una guerra que dura yá demasiaos años y, la segunda vez en pocos meses lloramos la muerte de mozos que se dediquen con enfotu al oficiu de reporteru", aseguró Mogherini.

   La ministra d'Asuntos Esteriores calcó en que la muerte de Simone "demuestra una vez más" lo urxente que ye "llograr una solución definitiva al conflictu" d'Oriente Próximu. "A los familiares y amigos de Simone quiero espresa-yos nel mio nome y nel de tol Gobiernu les condolencies por esta perda tan dolorosa", afirmó.

   Según informó l'axencia de noticies palestina Maan, el fotoperiodista italianu morrió esti miércoles en Beit Lahiya, na Franxa de Gaza, pola esplosión d'un misil que taben manipulando espertos artificieros qu'intentaben neutralizalu.