París (E.P.) .- El presidente de Francia, François Hollande, anunció esti miércoles l'envíu "nes próximes hores" d'armamentu a les fuerces del Kurdistán iraquín (peshmerga) en respuesta a les "necesidaes urxentes" espresaes poles autoridaes de la rexón semiautónoma pa combatir a Estáu Islámicu, según un comunicáu del Eliseu.

   Hollande defendió la necesidá d'aumentar la movilización internacional en vista de la "situación catastrófica" a la que s'enfrenta la población civil del Kurdistán. Francia aspira a xugar un "papel activu" en collaboración colos sos aliaos y "coles nueves autoridaes iraquines", personificaes nel primer ministru, Haidar al Abadi, acabante salir designáu.

   A la entrega d'ayuda humanitaria entamada nos últimos díes va sumase agora una nueva iniciativa pa "apoyar la capacidá operativa" de les fuerces que combaten contra los yihadistes d'Estáu Islámicu.

   "Coles mires de responder a les necesidaes urxentes espresaes poles autoridaes rexonales del Kurdistán, el xefe d'Estáu decidió, previu acuerdu con Bagdad, enviar armes nes próximes hores", esplicó'l Eliseu.

   Francia implícase asina na llucha armada contra l'Estáu Islámicu, tal como yá fizo EEUU, que la selmana pasada empezó a bombardiar posiciones del grupu estremista sunín na zona norte d'Iraq.