Un espectáculu que va axuntar a 150 artistes panameños, incluyendo a los ganadores del premiu Grammy, Rubén Blades y Damilo Pérez, va presentase nel canal de Panamá la fin de selmana que vien, na gala musical cola que van cerrase los actos en conmemoración del centenariu de la vía interoceánica.

“Va ser un espectáculu atacáu de pasión y enerxía que va contar la hestoria del canal de Panamá dende una óptica diferente”, señaló la productora de la gala, Madelaine Leignadier.

Leignadier indicó que l’eventu va durar 50 minutos, dixebráu en cuatro actos, nos que se van narrar los acontecimientos más relevantes del canal, al traviés d’imáxenes, canciones, bailles ya intervenciones grabaes de dellos personaxes que son parte d’esta hestoria.

Comentó que diba ser l’escenariu más grande construyíu pa un espectáculu televisivu en Panamá, con una extensión de 36,6 metros, dientro del Centro de Convenciones Figali.

Laignadier nun quixo afondar muncho más nel espectáculu, porque va ser “una sorpresa” tanto pa los invitaos asistentes como pa los que lu vean nuna cadena de televisión.

Amás de los músicos citaos, tamién van participar los cantantes Sandra Sandoval, Yomira John, Luis Arteaga, Ricardo Velázquez, Juliette Roy, Ricardo y Alberto Gaitán, Alejandro La Grotta, Gretel Garibaldi y Manuel Corredera, ente otros.

Tamién van tar presentes los ballets Nacional y Centenario de Panamá, el grupu de percusionistes de Ricaurte Villarreal y la Filarmónica Musicalion, nuna producción especial que va tener música orixinal y arreglos adaptaos del director panameñu David Choy.