El voceru de la Organización Mundial de la Salú (OMS), Gregory Hartl, aseguró que'l riesgu de contaxu del virus del ébola n'España ye "casi cero" y calificó de "correctu" el procesu de repatriación de Miguel Pajares, el sacerdote español infectáu pol ébola, y la hermana Juliana, que nun ta infectada pero que sigue ingresada nel Hospital Carlos III de Madrid como midida preventiva.
Nuna entrevista a Cuatro, Hartl informó de qu'hai "munchos" profesionales sanitarios n'España que tienen una "bona" formación p'atender posibles casos d'ébola ya informó de que la OMS y el Ministeriu de Sanidá, Servicios Sociales ya Igualdá tán en "constante contactu" gracies a los protocolos internacionales establecíos pol organismu.
"Vimos como se recibió a los dos relixosos n'España correchamente. Acabamos d'empezar una nueva fase y precisamos un pocu de tiempu, pero n'España hai muncha xente que tien bien bona formación pa facer frente a estos casos", insistió'l voceru de la OMS.
Esti vienres, l'organismu declaró como "emerxencia sanitaria internacional" el biltu d'ébola dempués de que más de 900 persones en dellos países d'África Occidental morrieren de resultes d'esti virus.
