La cantautora mexicana Lila Downs entama una xira de conciertos pelos Estaos Xuníos el próximu 11 d’agostu, un día enantes de que publique’l so nuevu discu, “Raíz”, nel que collabora cola española Niña Pastori y l’arxentina Soledad.

“Va pa dos años qu’entamamos cola idea de “Raíz”, ficimos amistá y familia cola música de México, Arxentina y España. Empezamos a trabayalo n’estudiu y salió un resultáu col que les tres tábemos mui contentes, porque préstanos enforma la idea de facer folclor, música de raigañu, con elementos modernos”, explicó Lila Downs.

Según l’artista, l’álbum acentúa los raigaños llatinos de les cantantes: “Les tres tenemos la idea de que sobreviva’l folclor fusionáu cola música moderna”.

L’álbum. compuestu por doce temes, inclúis tres orixinales de Lila Downs: “Zapata se quedas”, “Tierra de luz” y “Cumbia del mole”, que la cantante compunxo n´honor a les muyeres del so país de nación.

“La Cumbia del Mole” ficiérala de la que tuvo fuera del so país y quixo nella rendir tributu a les muyeres mexicanes que llevanten ceo a facer les coses del llar, les coses cotidianes. Y el mole ye un elementu sagráu nes sos vides, que se fai nes fiestes de los pueblos y compártese. Ye una tradición en México entero. Amás, la producción inclúi versiones de clásicos de la música llatinoamericana como’l tangu “El día que me quieras” y “La Maza”.

Pela parte d’ella, Niña Pastori, dos veces ganadora del Grammy llatinu, aporta’l tema “Válgame Dios”, demientres que Soledad ufre “El tren del cielo”. ësti ye un tema sobre un tren nes montañes andines, que-y pareciuó interesante pol tema de la migración, yá que fala en cierta forma sobre un tema escuru en México, del tren nomáu “La bestia” (qu’utilicen los indocumentaos p’aportar a los Estaos Xuníos).

Los arreglos de “Raíz” abarquen una amplia variedá d’estilos llatinoamericanos, dende boleros a chacareres a tanguillos y huapangos y les tres cantantes participen en toles canciones, cada una apurriendo al material el so toque particular. Esi toque qu’aporta’l so bagaxe profesional y personal y la cultura de les sos respectives tierres, que queda traducida nel videoclip del tema “Raíz”, en mantones bordaos tradicionales de los sos paises, elementos que Lila Down, como antropóloga, estudió.